面對貿易戰底下嘅關稅挑戰，有知情人士表示若美國關稅達25%，Apple就會考慮由中國撤離iPhone生產線。不過喺Apple未撤離中國前，佢喺美國本土就另一動作喇，日前Apple喺官方網站宣布將投資10億美元於美國德州興建113英畝嘅新總部園區，園區總容量為15,000名職員，初步可容納5,000名職員。

據了解，新總部園區鄰近Apple現有位於奧斯汀嘅設施，而新園區承諾採用100%可再生資源，同時有50英畝嘅對外開放空間，園區主要涵蓋工程、研發、運營、財務、銷售和客戶支援等崗位。而未來，Apple仲會喺西雅圖、聖地亞哥及卡爾弗城設立新辦事處，預料2023年喺美國境內將增加數千個新工作崗位，同時Apple仲計劃擴大喺匹茲堡、紐約及科羅拉多州嘅業務。

Apple CEO Tim Cook就喺一份聲明中表示，Apple好自豪可以為美國各城市帶嚟新機遇，仲大大增強咗Apple及奧斯汀市與奧斯汀市民嘅關係。而喺西雅圖、聖地亞哥及卡爾弗城等州份，Apple未來三年將增加1,000多名員工，而喺匹茲堡、紐約、博爾德、波士頓、波特蘭及俄勒岡州將增加幾百個新工作崗位。

來源：Apple