相信唔少玩《PUBG MOBILE》嘅朋友都見到遊戲近日有更新，而且仲轉晒做雪地版面！因為《PUBG MOBILE》即將推出第4個新地圖「Vikendi」，佢係一個6km x 6km嘅雪地地圖，除咗有大雪紛飛嘅專屬天氣外，仲加入咗新車、新衫及新槍。「Vikendi」地圖將會喺12月20日00:00 UTC開放下載，大約係香港時間12月20日早上8點可以下載，並於24小時後開放供玩家進行對戰。

今次嘅新地圖名為「Vikendi」，同時有唔少人叫佢做雪地地圖，係《PUBG MOBILE》中第4幅遊戲地圖，今次嘅地圖比「Sanhok (4km x 4km)」大少少，有6km x 6km咁大。地圖內有恐龍樂園、航天基地等特色地點，而玩家喺雪地行走仲會短暫留低腳印，所以大家要小心敵人喇！

有雪地就當然會有雪地專用嘅雪上電單車，今次新增嘅雪上電單車專為「Vikendi」而設，除咗駕駛者外仲可以坐多一個人。

以往綠色吉利服喺「Erangel」、「Sanhok」等有草地嘅地圖上都係所向披靡，不過今次「Vikendi」係雪地場，所以大家喺空投中執到嘅將會喺全新嘅白色吉利服，相信喺一片白茫茫嘅雪地中，白色吉利服將會好輕易避過敵人嘅追蹤。

而通常新地圖都會多咗唔同嘅槍種，今次「Vikendi」就加入咗採用5.56口徑子彈嘅突擊步槍G36C，佢有單發及全自動兩種模式，適合唔同距離下使用。

來源：PUBG MOBILE、ersincaki