由中國發射嘅月球探測器「嫦娥四號」於昨日成功登陸月球背面，成為人類歷史上首次於月球背面著陸。而「嫦娥四號」亦透過名為「鵲橋」嘅中繼衛星，向地球傳送第一張近距離拍攝月球背面嘅照片。「嫦娥四號」為人類了解月球邁向咗重要一步，因為呢一個永遠背向地球嘅神秘月背終於被登陸！

點解月球背面咁神秘？因為經過咗億萬年嘅演化過程，地球與月球之間嘅潮汐力令到月球嘅自轉逐漸減少，令到月球圍繞地球公轉一圈等於自轉一圈，亦即係所謂嘅「潮汐鎖定」。

而昨日(1月3日)北京時間上午10時26分，中國月球探測器「嫦娥四號」成功登陸月球背面東經177.6度、南緯45.5度附近嘅著陸區一South Pole-Aitken Basin(南極-艾托肯盆地)。而「嫦娥四號」著陸後，透過著陸器監視C相機拍攝首場近距離拍攝月球背面嘅影像，並通過「鵲橋」中繼衛星將影像傳回地球。 

今次「嫦娥四號」將會喺月球背面進行低頻射電天文觀測與研究，並進行巡視區形貌、礦物組份及月表淺層結構研究，以及試驗性開展月球背面中子輻射劑量、中性原子等月球環境研究。同時「嫦娥四號」會帶住裝有種子及昆蟲卵嘅密封容器，測試植物與昆蟲可否共同生長，當中包括馬鈴薯、擬南芥及蠶卵。

中國希望喺2030年趕上美國及俄羅斯成為太空強國，並計劃於2022年之前全面運行中國第三個太空站，及在2030年前將太空人送入月球基地。同時，中國會喺2030年前向火星發射探測器，包括可以將火星表面樣本送回地球嘅探測器。