世界移動通信大會(MWC)噚晚正式喺西班牙巴塞羅那展開，繼上星期三星發布咗旗下第一部摺Mon手機Galaxy Fold，中國手機頭龍華為亦喺MWC 2019中發布咗今年第二部面世嘅摺Mon手機—Mate X！而呢部Mate X比三星嘅Galaxy Fold更薄、螢幕更大，加上手機嘅摺疊角度更平，不過價錢方面就更震撼！

雖然華為Mate X同三星Galaxy Fold同為摺Mon手機，不過設計上係有所分別，Galaxy Fold使用咗內外兩塊螢幕，其中只有一塊喺攤開後先可以使用。而Mate X整部機只用咗一塊8吋(8:7.1)唧2480 x 2200 OLED螢幕，而手機摺疊後變為正面6.6吋及背面6.38吋嘅雙面螢幕。

Mate X除咗有8吋摺Mon外，喺機背有一個比較厚嘅握把部分，握把上配備咗三鏡頭系統、閃光燈、指紋辨識裝置、Type-C接口。而硬件方面，Mate X配備自家製嘅7nm製程Kirin 980處理器，以及 Balong 5000 5G晶片，最高上網速度達到4.6Gbps，並可以喺3秒下載1G影片。電池方面，Mate X配備4,500 mAh 電池，並支援55W超級快充，可以喺30分鐘充電85%。

幾犀利都好，最重要都係賣幾錢。Mate X售價為2299歐元，即約港幣20,425元，係目前華為最貴嘅智能手機，並非個個都買得起。Mate X預計喺2019年中發售，而其他地區嘅發售日期及價錢將稍後公布。