由已故微軟創始人之一Paul Allen創立嘅太空科技公司Stratolaunch日前宣布，自家開發嘅全球最大型飛機—「巨型雙體飛機」成功於美國加州沙漠完成首次試飛，並計劃最快於2020年用雙體飛機搭載火箭發射商業衛星到太空。

呢架全球最大型飛機—「巨型雙體飛機」並非用嚟載客，佢可以定性為太空貨運飛機，不過準確啲嚟講佢係一個高空發射台。由Stratolaunch所開發嘅火箭搭載於「巨型雙體飛機」上，並於高空發射上太空，原因係呢種發射方式可以節省燃料，亦更安全、可靠，因為唔需要擔心天氣或其他低空問題。「巨型雙體飛機」翼展達 385 英呎(約117 米)、機身高度15米、重約227,000kg，配備6個與Boeing 747相同型號嘅引擎，運載力達250,000kg以上。

「巨型雙體飛機」於加州莫哈韋沙漠起飛後於空中停留約兩個半小時，飛行最高速度為304公里，飛機爬升至5182米。Stratolaunch總經理Jean Floyd指出，試飛推進咗Stratolaunch為地面火箭發射系統提供靈活替代方案嘅使命。

來源：Reuters