三星(Samsung)年內最大部署—首部摺疊熒幕手機Galaxy Fold開賣前慘遭滑鐵盧，早前三星將Galaxy Fold寄畀外國媒體作實測，不出數日唔少手機熒幕出現問題，輕則熒幕凸起及破裂，嚴重者完全報銷，令原定今日於香港及星期三於上海舉行嘅Galaxy Fold發布會取消。如今三星正式決定，推遲原定星期五於美國Galaxy Fold公開發售日期，睇嚟部摺疊手機頭啖湯要拱手相讓畀華為喇！

三星於聲明中表示，由於多個測試版Galaxy Fold出現問題，所以官方決定推遲原定星期五於美國公開發售日期，以作進一步調查。而三星嘅初步調查顯示，Galaxy Fold熒幕故障可能與手機頂部及底部鉸位外露位置受到衝擊有關。而我哋噚日另一Post亦講過，有網民拆機顯示Galaxy Fold摺疊位置組裝非常複雜，一旦絞鏈零件移位就好易報銷。

其實今次三星剎停Galaxy Fold銷售都無可厚非，正所謂前車可鑑，2016年三星嘅Galaxy Note 7喺推出後先發生多宗自燃事件，令三星不得不展開全球回收，手執Note 7更被多間航空公司拒絕登機。所以今次三星算係有汲取教訓，如果開賣後先大規模出事就喊都無謂。

來源：Metro Radio