相隔兩年多，Apple 喺3月中正式推出第二代藍牙無線耳機AirPods，今次Apple 新加入咗焦點功能「聲控 Siri」，不過呢個功能究竟係咪咁實用？新AirPods 推出至今有一個多月，筆者喺使用咗一段時間希望同大家分享一吓，點先可以將AirPods 新功能發揮到最大威力！

無線充電盒版經常斷貨  要買仲有另一選擇

雖然第二代AirPods 已經推出咗一段時間，但相信唔係個個都咁易買到，因為各大Apple Store 配備無線充電盒版AirPods 都經常斷貨，而Apple Online Store 訂購亦需時約3 星期出貨，所以先Remind 一吓大家新AirPods 究竟多咗啲咩，等未買嘅大家可以揀到想要嘅AirPods！

今次新AirPods 提供兩款不同版本，一款係賣$1599 嘅「AirPods 配備無線充電盒」，另一款係賣$1299 嘅「AirPods 配備充電盒」，兩者分別只在於充電盒上，如果大家無需要用到無線充電不妨揀後者，因為各大Apple Store 都未有斷貨情況，而且價錢都平一截。而無線充電盒版除咗可以使用無線充電外，亦同樣可以用舊有Lightning 接⼝充電，可以話係多一個充電選擇。

接收能力佳  室內10米範圍清晰使用

無線耳機嘅接收能力非常重要，筆者以新AirPods 連接iPhone 聽歌時，企喺室內距離iPhone 約10 米左右位置，仍然可以清晰收聽音樂。而當筆者站於有房門與iPhone 及AirPods 阻隔嘅位置，大約7 米左右距離都可以清晰聽歌，而再行遠少少就會出現接收斷續情況；測試顯示新AirPods 與上一代AirPods 同樣強勁，而處於空曠室外地方，距離2、30 米仍可用新AirPods 收聽音樂。

▲上圖右邊為新AirPods，左為上一代AirPods。

新H1 晶片加快連接時間  音色與上代接近

除咗接收，連接都好緊要！新AirPods 採用咗全新H1 耳筒晶片，令耳機喺裝置之間切換時間快咗一倍，例如我由iPhone切換至MacBook，新AirPods嘅連接時間大約1秒左右，非常方便。此外，筆者使用AirPods 戴上耳仔連接時間大約為1 秒之內，而相反使用第一代AirPods 連接時間約為1.5 秒。傾電話方面，新AirPods與上一代同樣保持良好通話水準，喺市面上嘅真藍牙耳機嚟講，呢個價錢的確係數一數二。另外H1 晶片能夠減少遊戲⾳訊延遲達30％，不過音色方面聽起上嚟其實同上一代AirPods分別不大，有意入手嘅潛在買家不妨留意以上幾點！

配合Apple Watch發揮「聲控 Siri」最大威力

聲控Siri 功能對於唔少人嚟講的確係可有可無，因為日常都無乜幾多Apple用家會使用Siri，大家同意嗎？筆者以前都係咁諗，不過對於有運動習慣嘅筆者嚟講，聲控Siri 確實帶畀我全新體驗，仲可以將新AirPods發揮出最大威力！但一隻手掌係拍唔響，Apple 產品從來都係講生態圈體驗，所以我外出運動時都會戴上有電話功能嘅Apple Watch Series 4及新AirPods，因為做運動的確唔想帶太多嘢跟身。

外出運動Siri幫你「手」  不同裝置「喂 Siri」大不同

如果讀者們有配備電話功能嘅Apple Watch，我非常建議你入手新AirPods，因為多咗聲控Siri 功能，你可以完全喺免接觸及無iPhone情況吓叫Siri幫你做嘢，用家可以連手都唔需要郁，例如聽歌、轉歌、打電話、Send 短訊等等。試諗吓如果你跑緊步時想聽歌或者打個電話，Siri 都可以喺你唔需要接觸情況吓完成。另外，其實「喂Siri」呢句說話喺唔同裝置吓講都有分別，使用新AirPods時講「喂 Siri」時，聽緊歌嘅話唔會暫停音樂，而係會將音樂較細變為背景音樂；相反使用傳統EarPods的話，使用「喂 Siri」就會完全暫停音樂；只用iPhone播歌時使用「喂 Siri」更加係毫無反應，你需要用按鈕喚醒Siri。

與Apple Music組成生態圈  想聽咩隨時叫Siri

One More Thing！上文都講過Apple產品好講求生態圈，如果你同時有新AirPods、配備電話功能Apple Watch及有訂閱Apple Music。你就可以喺唔帶電話情況吓，想聽乜嘢歌就同Siri講！例如講，「喂 Siri，我想聽陳奕迅嘅歌」，咁當你喺跑步無帶電話期間，聽到你想聽嘅音樂，而且喺電話接收良好嘅地方，其實Apple Music串流速度同喺Apple Watch上播歌分別不大！如果你耳孔太大，戴AirPods做運動會鬆甚至甩的話，其實仲有一個選擇，因為Apple旗下Beats下月會推出新藍牙無線耳機PowerBeats Pro，佢備有掛耳位置，做運動就更加適合，而且同樣採用H1 耳筒晶片。