仲記得年初Apple CEO Tim Cook 指出，iPhone 售價過高令銷售下跌，尤其是大中華地區iPhone 銷情疲弱。不過今晨美股收市後Apple 公布咗第二季度業績，收入及盈利較市場預期優勝，全賴iPhone 於大中華區嘅減價策略，令中國市場銷售開始回穩，Apple 周三股價更一度升近6%，市值一度重登1萬億美元。

Apple 今晨公布2019年第二季度(2019年1月至3月)業績，雖然季度收入的按年跌5.1%至580.15億美元，但仍比《Bloomberg》分析員預測嘅收入575億美元為高；而每股盈利按年跌10%至2.46美元，同樣較每股盈利2.37美元預期優勝。此外，Apple 今年力推嘅服務收入亦有好表現，季度包括Apple Music、App Store 等服務收入達到114.5億美元，較市場預期113.2億美元優勝。

Apple 唔只銷售方面造好，公司亦宣布推出最多回購最多750億美元股份計劃，為一眾股東大打強心針。Tim Cook 指出，季度嘅iPhone銷售數字於最後幾星期明顯轉強，當中包括中國地區市場，佢認為係與Apple 於大中華區減價策略有關；Tim 又表示中國正放寬對新遊戲審批限制，相信對Apple 服務業務有幫助。

來源：Bloomberg