幸福在身邊啊！你知唔知道有人掛住你啊？而嗰個人可能就係你熟悉嘅人！Facebook 日前於加州聖荷西嘅年度F8開發者大會上推出新功能，就係名為「Secret Crush」嘅互相暗戀功能，呢個功能就好似交友App Tinder 一樣，要兩個人互相Add 入暗戀清單系統先會通知對方，然後大家就可以展可激情對話！

一直暗戀身邊嘅朋友，而你又唔知對方心意？Facebook 嘅新功能可能幫到手！喺Facebook 嘅Dating 功能中新加入嘅「Secret Crush」功能，用家可以最多Add 9個你暗戀嘅對象(會唔會太多啊？)入去暗戀清單，如果對方都同樣Add 咗你的話，咁「Secret Crush」就會被觸發並通知對方，顯示大家配對成功！

「Secret Crush」其實係Facebook 中Dating 嘅一個新功能，而去年9月Dating 於哥倫比亞、墨西哥、泰國、阿根廷及加拿大等5個地區推出，而今次Facebook 於F8中宣布Dating 會擴展至菲律賓、越南、新加坡、馬來西亞、寮國、巴西、秘魯、智利、玻利維亞、厄瓜多、巴拉圭、烏拉圭、蘇利南以及圭亞那等14個地區，預計今年年底亦會正式於美國地區推出。

令人失望嘅係，香港嘅朋友想發掘身邊互相暗戀嘅人，就再要等待Facebook嘅更新喇，不過幸福始終掌握喺自己手中，不如勇敢啲行前一步向對方表達心意！無嘢嫁，最多咪被Fd Zone，好過估估吓先！

來源：Tech Crunch