唔止香港危險，全球暖化亦令地球面臨重大威脅，不過嚟自德國嘅天文學家帶嚟咗新希望！日前德國 University of Göttingen (哥廷根大學)研究團隊，發現咗2顆與地球相近，並幾乎可以滿足維持生命所有條件嘅行星，兩顆行星位於太陽系以外嘅12.5光年位置，有一個比太陽更冷、更暗嘅恆星 Teegarden's Star。

University of Göttingen 負責人 Mathias Zechmeister 指出，今次研究係透過德國與西班牙嘅 Calar Alto Observatory 共同合作天文台，一個 CARMENES 天文望遠鏡進行觀察。

今次所發現嘅兩顆行星名為「Teegarden's Star b」及「Teegarden's Star c」，經由天文學家估計軌道及旋轉速度後計算，兩顆行星可以容納岩石環境及流動嘅水，幾乎可以滿足支撐生命嘅每一項要求，並與地球質量幾乎完全相同，不過以上假設都係天文學家嘅估計值，而唔係實際觀察結果，所以要判定兩顆行星係咪適合人類居住仍要繼續進行研究。

其實兩顆行星都係圍繞距離地球12.5光年(即113,523,125,760,000公里)以外嘅恆星 Teegarden's Star，呢顆恆星與太陽相近但不盡相同，佢係一顆位於白羊座嘅古老 M 型紅矮星，年齡至少有80億歲，比45億歲嘅太陽仲要老，所以圍繞佢公轉嘅兩顆行星會有足夠時間進化出高等生命。

Teegarden's Star 雖然睇起嚟似太陽，但從天文學家觀察顯示出恆星非常安靜，並無恆星耀斑爆發嘅跡象，而佢嘅表面溫度只有2,700℃，喺恆星之中算係非常低，質量只有太陽10分之1。此外，由於 Teegarden's Star 睇起上嚟非常暗，視星等只有15等，所以一直到2003年先被天文學家所發現。

來源：Space.com