過去 iPhone 11 嘅概念圖、渲染圖已經曝光咗唔少次，可以知道新 iPhone 將會採用 3鏡頭設計。而今次可以更加確定佢嘅外形設計，因為日前英國手機配件商 Olixar 已經開始接受 iPhone 11 Max 透明保護殼訂購，令 iPhone 11 外型設計徹底曝光！

由 Olixar 網站可以睇到，iPhone 11 Max 嘅外型最大變化就係機背鏡頭位置，新 iPhone 採用咗目前唔少智能手機都配備嘅 3鏡頭系統，而整個機背鏡頭組位置呈方形兼凸起。據早前知名蘋果分析師郭明錤透露，iPhone 11 機背第三個鏡頭係超級廣角鏡頭，並用上咗某種黑色塗層處理，令鏡頭無咁容易被發現。

從圖片可見，其實齋睇 iPhone 11 嘅機面與今代 iPhone XS 分別唔大，最大唔同嘅位置都係機背嘅三角形排列鏡頭組。iPhone 11 嘅 3鏡頭凸起位置非常明顯，而所佔面積都比歷代 iPhone 都要多，至於美感方面有唔少人喺相關概念圖出現時都有批評過，但似乎新 iPhone 嘅方形鏡頭組勢必推出，而早前亦有圖片流出新 iPhone XR 都會採用相同鏡頭設計。

來源：9to5Mac