近年唔少私人企業都發展太空科技，而英國億萬富翁 Richard Branson 旗下除咗有太空旅遊初創公司 Virgin Galactic (維珍銀河)外，其實仲有另一間 Virgin Orbit (維珍天體軌道)。Virgin Orbit 日前就成功於美國加州 Mojave Desert 上空，於一架飛行中嘅飛機上發射一枚測試火箭，令衛星由空中發射至太空嘅計概踏出一大步。

喺今次嘅測試中，一架經過改裝嘅 Boeing 747 飛機「Virgin One」將一枚假火箭運載至數萬呎高空，並成功於空中將火箭發射。Virgin Orbit CEO Dan Hart 指出，呢次係公司空中發射系統嘅最後一次重大測試，而呢個項目已經進行咗4年多。

為咗模擬相似火箭重量，Virgin Orbit 團隊喺假火箭中加入咗防凍劑及水嘅混合物取代燃料，而未來幾星期 Virgin Orbit 將對第一枚使用空中發射系統嘅火箭展開一系列檢查，如果一切順利公司會喺夏季結束前進行首次火箭正式發射，而客戶嘅首次發射就會幾個月後進行。

Virgin Orbit 係由英國億萬富翁 Richard Branson 擁有嘅飛行公司之一，於2017年初成立，目前已經研製出 LauncherOne 火箭。今次 Virgin Orbit 採用由空中發射嘅方案有別於傳統地面火箭發射方式，而微軟創始人之一 Paul Allen 創立嘅太空公司 Stratolaunch 都有研究於空中發射火箭。

來源：The Verge