寶馬YouTube頻道嘅車主故事BMWstories，向來被車迷好評。日前發表新作，講述一位17歲時無家可歸嘅青年，如今已是坐擁半百經典寶馬嘅汽車收藏家。相對其他在BMWstories亮相嘅車主，這位不願透露姓名及只露出面部輪廓的寶馬super fans，實在神秘感十足，不過，有網民已經搵到佢之前接受過另一汽車網絡傳媒訪問，仲見晒樣添。

E30 M3，一定要有啦，唔係點算寶馬收藏家

呢位喺美國南加州嘅收藏家，目前已擁有45部60至80年代嘅寶馬汽車，據悉，佢另外有多部BMW Alpina珍品。佢第一部收藏品係1600，1600? 2002我就聽過，仲有啲可能連世伯都未聽過嘅寶馬700 RS，係寶馬喺六十年代參與歐洲主要登山賽嘅戰車，白雪雪，開篷，後置引擎。德國房車賽殿堂級車手韓史德（Hans-Joachim Stuck）嘅爸爸Hans Stuck（都係譯韓史德），就揸過700 RS。

當然，仲有元祖3系（E21）、元祖6系M6（E24）、E30 M3同埋大量2002，你講得出同你未見過嘅寶馬佢都幾乎有齊，唔怪得佢話佢嘅經歷同故事，就係American Dream嘅寫照。

呢位收藏家會保留上手車主嘅鎖匙扣，因為每條匙都有佢嘅故事

人話寧欺白鬚公，莫欺少年窮，年青嘅車迷，唔好成日同自己講「這些機會不是屬於我的」，呢句話只會累死你，相信自己，你大把世界！

佢話咁多年嘅收藏品都唔會用嚟炒賣，因為買車係為開心，為享受駕駛樂趣，唔係為賺錢