Photos: gazoo.com（梶山真人）

鍾意日本文化，未必有煲過日本動漫《頭文字D》，但應該仲會記得周董喺電影版《頭文字D》飾演過主角拓海，亦可能仲記得、甚至「耐不耐」狂loop杜汶澤嘅喺戲中嘅金句：「我要買GT-R！」。

但係，唔多見有人提《頭文字D》作者重野秀一先生，究竟佢點解睇中豐田Sprinter Trueno 86(AE 86)？現實生活嘅佢，會唔會係AE 86嘅車主？佢玩過幾多車？而家佢搞緊乜？

聞說重野老師愛低調，要約佢做訪問唔容易，咁搵日本汽車界巨人---豐田呢位大哥大出面，重野老師點都要畀面喇啩！豐田屬下汽車生活網站gazoo.com最近訪問佢，睇吓佢有咩講。

重野秀一喺1958年出世，生於新潟縣十日町巿松之山，高中年代已經好鍾意揸電單車，佢話七十年代嘅佢，雖然係御宅族，但已遊說父母畀佢去東京讀大學，有咁嘅諗法，真係好唔尋常。

佢做學生，已經有幫漫畫師做助手，1981年，喺《增刊少年雜誌》首度發表作品，但真正嘅成名作，要到1983年先出現，就係以電單車為主題嘅《バリバリ傳說》（バリ係電單車引擎嘅形聲詞）。80年代嘅日本，有所謂電單車熱潮，好多男人或中產家庭，都會養部電單車或買部電單車畀啲仔女，重野秀一嘅《バリバリ傳說》食正呢個浪，旋即大熱，由1983年至1991年，總共推出38回，賣出約2600萬本。

世紀合照

作品大熱，重野老師回憶收到第一次版稅，未有好似當時唔少日本人咁，喺豪宅區起番間靚屋（照咁講老師嘅首次版稅應該好肥），反而用咗部份錢，買咗人生第一部新車，豐田Sprinter Trueno 86(AE 86)。佢話：未創作《バリバリ傳說》之前，我仍然係一個窮學生，住喺狹窄嘅apartment，言談間，重野老師對住屋嘅要求唔算高，佢話而家住喺住宅區嘅多層大廈。

講到點解當年會買86，真係估唔到老師畀啲咁嘅答案。佢話：「汽車嘅嘢，我真係唔多識，我淨係知『四個轆』唔使好似電單車喺雨天濕晒身，揸車嗰陣又可以同女朋友偈計，仲有，汽車乾淨優雅，形象比電單車污糟大塵好。」（呢番話出自電單車迷兼電單車漫畫作者嘅重野老師口中，零舍持平中肯）。

老師話當年同AE 86結緣，緣於一次揸電單車經過東京目黑通豐田陳列室，當時豐田啱啱發表咗Sprinter Trueno冇幾耐(AE 86，編按：時間約為1984年至1985年)，冇幾耐之後，重野老師就成為86嘅車主，時至今日，佢部86裝咗momo軚盤同換咗碳纖引擎艙蓋。

momo軚盤，八、九十年代已開始玩車嘅巴打，好可能都擁有過

唔少《頭D》fans都聽過重野老師有部AE 86，原來佢玩過唔少豐田車，算係「豐田粉」，佢話：「我都揸過Levin（KE 71），但副偈「冇乜力」，部車唔算實淨，傾側多啲。之後玩過1300c.c. Starlet（編按：香港稱為小福星，Echo前身），後來亦玩過第二代Soarer，嗰部係一部好舒服嘅雙門豪華Coupe。豐田之外，我都揸過Subaru（富士），Impreza幾好，論線性表現，幾接近AE 86，我曾經諗過賣鬼咗部AE 86，Keep部Impreza算，好在最後都冇咁做（笑）」重野老師而家除咗有AE 86，原來仲有部平治E-Class。

重野秀一正構思新作，書架上有唔少與棒球相關嘅書籍

筆者有位玩車界好友，佢有句金句：「幾飛仔，後生幾抗拒Benz都好，到年紀大咗，自自然會買部Benz坐吓。」似乎，幾年後「登六」嘅重野秀一老師都唔例外。

重野秀一老師嘅工作室，冇電腦，只有紙同筆