最近有個飯局，當中有相識多年嘅朋友，亦有啲素未謀面「朋友嘅朋友」。

男人主導嘅飯局，話題實有車，其中有位喺海外長年生活，嚟咗香港冇幾耐嘅巴打，已經好似睇透香港人買車心態。佢話：「好多買新車嘅香港人都係Snobbish（沙塵友），買得起車，梗係揀部大啲，貴啲，引擎容積大啲啦。」

唔知你點睇呢位哥仔講嘅嘢，我就幾有保留。

我總覺得，除非係好熟嘅朋友，否則唔好逢人就對人講：「細車好揸呀」、「而家啲細c.c. Turbo引擎好好力架喇」，任何被視為新技術、新科技，都有可能被理解為「花巧」、「冇嗰樣整個樣」，隨時畀人以為你唔識車，係蠢仔，係豬嘜。

時近2018，所謂「細車」兼配「細c.c. Turbo引擎」嘅新盤，其實一啲都唔細。以今次MenClub去德國漢堡地區測試嘅Volkswagen Polo 1.0 TSI，車長約4.1米，軸距都有接近2.6米，絕對唔再係你十幾年前認識嗰種Polo。

睇相或睇片，第一眼會覺得Polo幾似Golf，我估Volkswagen唔介意外界有咁嘅睇法。望真啲，今代Polo車身兩側、掀背尾門腰線、鬼面罩上緣、泵把都加咗唔少硬朗線條，近睇同遠睇都比過往幾多Sharp醒。

排資論輩，Polo依然係Golf個細佬，事實上，Polo亦係細部啲，但今代Polo喺觀感上嘅改變好大，揸出嚟或泊喺街，更加有性格，畀到人德國車應有嘅信心。即使係「細佬」，都係一個行出嚟獨當一面嘅「細佬」。

車廂內櫳方面，轉變非常之大，唔係話變到日本細車咁花俏，而係高級咗好多，不論用料或觸感都係。

今次試車，我哋試揸過多個級別與版本，部份中控台嘅飾板同飾框與車身同色，呢樣我好Like。我唔知咁嘅意念源自邊度，但的確令我想到五、六十年代Volkswagen Microbus同Beetle。

話新一代Polo高級咗，係有根有據，例如中控台配備觸控屏幕、LED儀錶，兼且配備手機無線充電系統（支援最新iPhone 8同iPhone X）。一公仔Turbo車仔配咁勁嘅specs，好有鬥心喎。

動力系統方面，999c.c.直列三汽缸渦輪增壓引擎，最大馬力115匹/5000rpm-5500rpm，峰值扭力20.5kgm/2000rpm-3000rpm，1公升Turbo車仔有20.5kgm峰值扭力，換轉喺幾年前講都冇人信。我先後試過7前速DSG雙離合器自動波版本同手波版。

呢款直三Turbo引擎，喺D波（DSG）狀態，動力輸出偏柔，深踏油門加速，動力嚟得不急不緩，啱啱上車揸一陣，會誤以為佢「冇乜力」。

其實上代或上兩代Golf嘅1.4公升122匹版本，都有近以嘅tuning，設計出發點可能係：畀到足夠動力你喺巿區用或高速巡航用，引擎又唔使被催谷到高轉，咁就自然用少啲油，車又靜咗，亦有助降低廢排，冇理由唔俾Like。

沿住漢堡巿郊一啲唔算好斜嘅彎路，反覆進出小村落，一入村，要將車速降到30km/h，否則好易被影「快相」。

駛出村口，撥去S波，見到70km/h、100km/h路牌，不斷加速，呢啲區域人口稀疏，快揸五、六分鐘先見到有對頭車。朝早試過95匹馬力嘅五前速棍波版，加速已經幾緊湊，當坐上呢部115匹Polo 1.0 TSI，更加覺得佢幾有跑味，佢轉數上得快、順、滑、靜，更加比好多來自日本、法、意嘅細c.c.直四自然吸氣引擎滑溜，個人認為佢足以同寶馬（BMW）318i嘅1.5公升直三Turbo機器看齊。

睇動力輸出水平，其實同上段講過嘅上代或上兩代Golf 1.4（122匹）差不多，但Polo始終係輕啲，以DSG 115匹版本為例，僅重1175kg，所以keep住60km/h至90km/h喺窄彎或大彎遊走，好輕快。

所以話，試配備雙離合器自動波箱（包括DSG波箱）新車嘅你，你呀，講緊你呀，同埋你呀，記得試埋S波嗰邊！

我約喺千禧年初首次接觸Polo，當時係配1.6公升棍波嘅Polo GTI，好揸到呢……睇住Polo經歷幾代轉變，車架、車門硬淨咗好多好多。

個人而言，我覺得上代Polo已好硬淨牢固，佢認第二，都冇邊個夠guts撲出嚟敢挑戰。

嚟到新一代，純以體感去講，喺落差大或巴爛路面急左急右快扭，新Polo嘅硬淨程度好似同Golf冇分別，你話我黐線又好擦福士鞋又好，我覺得Polo 1.0 TSI係可以玩吓Trackday嘅車仔，而且會幾好玩。

懸掛方面，我先後試咗多個引擎輸出級別同版本，當中有部份車輛裝有選配（optional）硬度調節懸掛，舒服軟熟固然得，行靚柏油路亦好好飛。

整體而言，新Polo喺轉用MQB底盤之後，特別是重新調整扭力桿（Torsion Beam）後懸掛之後，後懸及毗鄰區域嘅噪音，都比上一代細咗好多，特別是駛經密集起伏嘅路段，後輪亦更加貼地，搞到我一度以為佢配咗多連桿（Multi Link）後懸掛。

Polo 1.0 TSI有咩明顯缺點？

今次試嘅新Polo，大多數配17吋215/45 R17輪胎，部份配16吋。喺新底盤同更寬更大輪胎配合下，入彎反應係幾sharp，而轉向亦算準繩，但扭軚時嘅回饋力稍嫌人工化，路感亦唔算豐富。

另外，底盤調校始終偏向保守，彎路總係規規矩矩，以循跡性至上，後輪亦

唔會好刻意對車頭指向有積極，甚至係過於積極嘅追隨。

睇嚟，路感豐富嘅懸掛同軚感，都係留返畀200匹嘅Polo GTI架喇，唔使玩到咁辣咁「大馬」，Polo 1.0 TSI非常值得考慮。

Volkswagen Polo 1.0（115匹版本）規格

售價：待定

代理：Volkswagen Hong Kong  www.vw.com.hk

車型：五門五座

體積：（長）4053mm x（闊）1751mm x（高）1461mm

軸距：2551mm

引擎形式：999c.c. 直列3汽缸，缸內直噴，渦輪增壓，前置引擎

馬力：115匹/5000rpm-5500rpm

扭力：20.4kgm/2000-3500rpm

波箱：7前速雙離合器自動

懸掛：（前）麥花臣支柱；（後）扭力桿

0至100km/h加速：9.5秒

極速：200km/h

車重：1190kg

耗油：4.7L-4.8L/100km（巿區及公路混合計算模式）

行李艙：351公升，可擴展至1125公升

油缸：40公升

輪胎：（前、後）Michelin Primacy 3 215/45 ZR17 91W