Photos: 九鼻子（L.A.）

海膽，雌雄同體，殼內無肉，我們經常話「食海膽」，其實只係卵。每隻海膽有5條生殖腺，所以一定有5件。如果閣下order原隻海膽，上到枱缺一，可能有部份已落咗師傅個肚內嘞！

海刺，生吃絕不好味，但一定要識分辨，慎防被騙。

外觀上很容易辨認，因為刺長、尖且有毒，不建議徒手取拿。既然刺有毒，肉質又苦澀，識食一定唔會生食，哪管你係海裏的魚或岸上的人，因此，存活率較高，喺香港水域也容易捕獲。

可惜，仍有好多無良奸商，用海刺扮海膽，混水摸魚，拆掉外殼後，實難分辨誰是海膽或海刺，正宗係呃您「識卵咩？」。

不過，海刺夠便宜，用來熟食不錯，例如蒸水蛋、炒蛋、炒飯。

我喜愛食海膽的程度絕對有10級，生理上可以吃很多，但經濟上不容許（特別喺香港、台灣及日本）。想食本地海膽，當然揀西貢糧船洲海膽養殖場，新鮮得嚟，價錢大眾化，$35一隻，檔主喺正您面前原隻剪開，慢慢歎。不過，環境就一般，想配美酒更需自携。

坊間有說法，北海道馬糞海膽最鮮甜，但近年多了中國大連的冒牌貨進口，大家要提防提防。曾經喺香港食過一次，但不覺特別鮮甜，size也較細，口感略遜，所以今次暫不評論，留待下次到北海道品嚐後再分享。

今次配日本米酒，分別為純米吟釀及純米大吟釀，結論係：純米吟釀憑較重的米香及body，配海膽較佳，畢竟海膽自身味道較重，口感厚膩，假如配搭清香細緻的純米大吟釀，實在有點浪費。

記得2012年遊智利酒莊時，有幸食到秘魯海膽，好大隻，色澤和大小跟加拿大空運本港的海膽差不多（City Super有售），由於新鮮即食，特別鮮甜美味。在當地漁巿場拆肉後放滿一礦泉水樽出售（大約重1公斤），每樽只需$7美元，折合約五十多港元，抵！ 

有一日，我在午餐吃了兩碟，第一碟隨智利人的食法，將海膽放在一小塊烘多士，伴少許生洋蔥碎，再點檸檬汁，非常美味，食味好有層次。一碟不夠喉，第二碟我不放配料，純粹細心品味海膽的鮮甜味和creamy口感，配Santa Helena喺Colchagua coast出產嘅Gran Reserva Sauvignon Blanc，這一支無存木桶aging的fruity白酒，冰凍爽口，酸度中和了海膽的厚膩口感，令我不知不覺連拆兩大碟，埋單計數，只係200港元，真的要學人感恩感恩！

事隔數年，仍對秘魯海膽念念不忘，想再去食不容易，坐飛機連轉機要30小時。

幸運之神眷顧，上月到L.A.，無心插柳竟再遇到這秘魯美食。好友帶我到Maruhide Uni Club。

睇名就知專門食海膽，這家由日本人開設的餐廳，一直主打L.A. Santa Barbara出產嘅海膽，但到訪當日因天氣關係，轉賣秘魯海膽，開心到我呢。

喺L.A.食秘魯海膽，始終唔夠喺智利食咁平，但以香港人消費標準而言，一啲都唔貴，50g只售$9美元。

Order了兩款沙律，一款的醬料加入海膽，另一款海參沙律混入海膽碎，我較喜歡後者，配合海參彈牙口感，更有層次。

主角出場，簡簡單單的海膽刺身，不用點醬油，識食當然係用海膽卷住少量新鮮wasabi，少許海鹽，鮮甜得令人感動。最欣賞店主選用新鮮wasabi，香而不辣，也不攻鼻，最重要係無搶走海膽自身嘅鮮甜。一碟220g約有10件，只需$37.50美元。

雜錦刺身飯無需多介紹，抵食，但選用的海膽檔次相對地遜色，食到有少少沙。另外，不得不提海膽意粉，忌廉汁進一步帶出海膽的鮮甜，老少咸宜。

由於當日要駕長途車，只能選綠茶，綠茶有誠意，不是貪快的綠茶粉。

如果當日燈神在則，又送我一個願望，真想有幾支紐西蘭Greywacke出產嘅Pinot Gris，同老友記開心share。這款酒帶微甜果性，冰凍爽口兼酸度靈活，是我試過配搭海膽刺身的最佳選擇。