我成日都話「鹹濕」往往係推動新科技嘅主要力量之一。好似AI圖像生成技術咁，除咗專業人士之外，大部份普通人接觸得最多嘅就係AI生成J圖，又或近來越黎越常見、能夠將普通照片中嘅人變成裸體嘅「脫衣AI網站」。但所謂「色字頭上一把刀」，近日有網絡安全專家警告呢啲「脫衣AI網站」好可能含有惡意程式，有可能溢取使用者嘅密碼及瀏覽器Cookies等重要個人資料。

據網絡安全專家組織「Slient Push」近日發佈嘅研究報告指，佢哋於今年7月時發現俄羅斯駭客團體「FIN7」旗下嘅超過4,000個網域及IP位址中，有7個係利用「脫衣AI」DeepNude作招徠以吸引受害者，再藉機植入惡意程式嘅危險網站。Slient Push分析指出呢類網站主要有兩個手法，第一係網站會聲稱提供「免費下載（Free Download）」嘅脫衣AI，然後將用家轉到Dropbox等雲端儲存網站，而下載落黎嘅就係惡意程式；另一種手法則聲稱提供「免費試用（Free Trial）」，並要求用家上傳一張想「脫衣」嘅照片，到用家下載經處理嘅照片時，下載檔中就會包含惡意程式。

Slient Push點出嘅7個網站

Slient Push指出「FIN7」利用惡意軟件竊取用家嘅憑證及Cookies，亦有可能透過遠端存取植入更多惡意或勒索軟件。駭客亦會利用搜尋器優化（SEO）或直接買廣告等方式，令上述「脫衣AI」嘅網站出現於其他成人網站或內容之上，吸引用家瀏覽。而縱然上述提到嘅7個網站目前都以被刪除，Slient Push相信網上仍有大量類似嘅惡意網站及詐騙手法。所以大家遇到呢類廣告或網站要特別小心。

資料來源：Slient Push