早前Kanye West與太太Bianca Censori「不請自來」登上格林美大獎紅毯，後者更（疑似）於Kanye West指令下，於記者面前脫下大衣，露出僅穿透明衣服嘅全裸軀體，畫面震驚全球。但大家八卦之餘亦一定會諗：「點解要咁做呢？」結果近日有外國報導指Bianca Censori自己其實都唔想咁做，更因為此事而向Kanye West 提出離婚。

據英國八卦小報《DailyMail》引述「知情人士」報導，Bianca Censori對於當日在格林美紅毯上「不情願地」跟從Kanye West「大鬧一場（Make a scene）」嘅指示脫下大衣、露出身體感到相當不快，已向Kanye West提出分手，並預期會於日內正式從法律層面提出離婚。據「知情人士」指二人目前身處兩地，Bianca回到位於洛杉磯比華利山嘅大宅，而Kanye West就疑似回到過去一年常駐嘅東京酒店。

現年30歲嘅Bianca Censori與Kanye West於2022年12月結婚，婚後多次因為以極為性感嘅打扮出席公開場合而登上各國娛樂版，但坊間一直都猜測性感打扮究竟係出於Bianca本人意願，定係Kanye West對其嘅操控。據估計，假若二人真係離婚的話，Bianca應該會獲得約500萬美金嘅「分手費」。

但離婚傳出冇幾耐，二人經理人公司TARANTULA嘅代表Milo Yiannopoulos就公開闢謠，指「Ye和Bianca目前都在洛杉磯，準備享受情人節。有關佢哋嘅私生活嘅公告應該只來自佢哋本人，並非八卦報章上無來源嘅謠言」，隨後仲諷刺媒體對二人關係一直窮追猛打「今次係第五定第六次媒體報導Ye同Bianca分開？我都數唔清啦。」

資料來源：DailyMail、E! Online