但凡社會要討論「打機係咪教壞人」呢個議題，《GTA》系列遊戲永遠係第一個被拎出黎嘅例子，哪怕《GTA》後來成為全球現象級遊戲鉅作都依然不能幸免。而曾負責過所有《GTA》系列、以至兩集《Red Dead Redemption》、《Bully》、《Max Payne 3》等遊戲嘅前Rockstar總編劇Dan Houser於一個電台訪問時表示，《GTA》嘅成功後來更引起美國政府嘅追查，指遊戲本身已經成為「文化代罪羔羊」。

Dan Houser與目前仍係Rockstar高層嘅哥哥Sam

卻說Dan Houser早前登上英國Virgin Radio節目《The Chris Evans Breakfast Show》，並談到《GTA》系列一直被人鬧「教壞細路」。對此Dan Houser表示，佢哋其實只係想證明「一隻Game係可以設計畀大人玩」，但有人被呢個諗法冒犯。而當主持人追問《GTA》系列嘅成功有無令到類似情況減少，Dan Houser就一口否認並指：「完全相反，成功反而令我哋有更大麻煩。」

Dan Houser回憶指，最嚴重嘅一次事件，係美國政府都正式開始查Rockstar：「佢哋話我哋販售色情內容，差啲搞到我哋執笠。最終我哋被罰咗一大筆錢，公司陷入騷亂，更有人要因此離職。」Dan House亦指，美國政府之所以咁強硬，係因為佢哋需要一隻「文化代罪羔羊」，「佢哋唔可以搞荷里活、又唔可以搞Rap音樂，因為政治同種族議題太敏感。於是佢哋就搞唔會反擊，又足以製造聲量遊戲界。」，並指「佢哋將美國所有問題都怪哂落我哋到。」

《GTA: San Andreas》

雖然Dan Houser無講明究竟係邊件事，但訪問出街後唔少人都估計佢講緊2004年《GTA: San Andreas》嘅「熱咖啡事件」。話說於該遊戲中，玩家可以結識部份女角，並透過約會增加好感，好感度達到某個水平時，女角就會邀請玩家去上房「飲杯熱咖啡」。

正常黎講兩個角色入屋之後，畫面就會影住女角間屋並拉遠晃動，同時出現呻吟聲，以表示二人嘅行為。但由於遊戲開發初期的確有做出兩位角色做愛嘅畫面，只係後來礙於遊戲分級將其隱藏，於是後來就有人發放「熱咖啡補丁」，將隱藏消除，玩家就可以睇到做愛畫面。

事件曝光之後，美國當局立即將遊戲評級由「M」（Mature, 17+) 改為「AO」（Adults Only），店鋪亦將遊戲下架。最終Rockstar要進行大規模回收並改版，回歸到「M」級重新推出。Rockstar及母公司Take-Two 亦要額外賠償超過2000萬美金，以換取不被起訴。