早買早享受，遲買貴幾舊！各位機迷注意，距離《GTA 6》推出仲有大約8個月，如果打算買機或換Pro版迎接大作嘅，可能要盡快入手。Sony近日宣布，因應全球經濟壓力及零件成本上漲，將由4月2日起調高PS5系列主機及PlayStation Portal全球多地售價，其中PS5 Pro更一口氣加價150美元，售價升至900美元，加幅相當誇張。

據Sony官方PlayStation Blog公布，由4月2日起，美國，英國、歐洲及日本將率先加價。以美國為例，PS5光碟版將由549美元加至649美元（+18%），數位版則從499美元加至599.99美元（+20%），而本身定價已經唔平嘅PS5 Pro，更加由749加至899美元（+20%）。另外PlayStation Portal就從199美元加至249美元（+25%）。目前香港暫未公布最新售價，但如果跟隨相近加幅，Pro版有機會從現時嘅HK$5,780加至接近HK$7,000。

對於今次加價，Sony互動娛樂（SIE）全球營銷副總裁Isabelle Tomatis解釋，價格調整係為咗應對「全球經濟環境持續嘅壓力」，並形容呢個決定係確保公司能夠繼續為全球玩家提供創新、高品質遊戲體驗嘅必要措施。

事實上，早前已經有唔少分析師同調查機構指出，隨住AI爆炸式增長，全球數據中心正「掃貨式」吸納全球記憶體及儲存裝置供應，未來嘅電腦、智能電話、遊戲主機等電子產品難免會加價，只係估唔到下代主機未出，現役嘅PS5就已經頂唔住成本壓力率先加價。至於任天堂同Microsoft會否跟機齊齊加價，就仍有待觀察。