吉野家幾乎同牛肉飯劃上等號，但太出名，就等同被定形，想轉形，零舍吃力。喺日本，吉野家決定「撈過界」，有計劃大搞居酒屋，呢個消息確實令不少日本人意外，究竟點解？

據日本吉野家發言人話，部份設有兩層的分店，在放工後及晚巿的客人數目明顯不及日間，公司希望「善用資源」，特別試行在個別分店於晚間轉 做居酒屋，命名為「吉吞み」，吞み解作喝。一般來講，落單5分鐘就嚟齊食物，店內設有電視，但不准吸煙，而營業時間由下午5點半至晚上10點半，真正乖乖居酒屋。

據悉，位於東京神田的吉野家，在去年7月仍錄得赤字，自從引入「吉吞み」後，夜間的生意額就大增40%，分店成功轉虧為盈。有見及此，吉野家已決定來年多開30間「吉吞み」，主要都係靠近JR或私鐵站，並設有2樓的分店，若發展理想，不排除將其居酒屋分店增設至400間，足足係吉野家在日分店總數的3分1，嘩！好有決心喎。

目前東京、大阪合共只有6間「吉吞み」，咁究竟有乜好食，價錢又點？

原來都真係幾大眾化。生啤一大杯310 yen、吉野家招牌汁煮牛肉350 yen、六片吞拿魚魚生300 yen、炸豚肉丸350 yen、燒魷魚300 yen、枝豆150 yen、炸蝦 250 yen、麥芽啤400 yen、梅酒350 yen、日本清酒300 yen、烏龍茶120 yen⋯⋯種類多，詳情自己上日本吉野家網站睇。

有日本零售業分析人士認為，吉野家進軍居酒屋巿場，某程度上反映了日本就業巿場待遇轉差及打工仔消費力正在下降，因為中、下收入的受薪階層（主要講男人）因多種原因（可能係仔女學業開支、房屋開支、家庭開支、增加家庭儲蓄款項），而減省個人工餘時的消遣費用，以前大班同事放工去大大間嘅食店飲飲食食，而家同事或儕朋有「共識」，一齊「食平啲」，去啲巷仔舖，又或吉野家居酒屋。

照上面嘅分析，日本嘅打工仔、打工佬、打工爸爸都幾唏噓，但又幾偉大。

辛苦晒！

吉野家「吉呑み」網址：http://www.yoshinoya.com/yoshinomi.html