羅致光局長的「當大家都120歲時，60歲才算是中年。」偉論，確實是對大家的當頭棒喝，原來60都仲有大把世界呀！既然60不過是中年的年紀，咁大家真係要好好延長青春期，要勁過局長，令自己60都咁仲係咁青春！

尋求新挑戰

有否發覺，年青時咩都夠膽死，玩要玩要X GAME，又勇於參加比賽，工作做得悶就走出來創業。但當人大了，生活漸安穩，顧慮漸多，就開始船頭驚鬼船尾驚賊，對所有新事物都耍手擰頭，只想每件事都盡在掌握之中，令身心也變得蒼老。要保持青春，最佳辦法是無間斷尋求新挑戰，學習新事物，刺激腦部思考，想老都幾難。

與年青人為伍

想年青，最直接做法梗係埋年青人堆啦。年青人喜歡甚麼、年青人潮興甚麼、年青人講甚麼食甚麼想甚麼，與他們做好友，從他們的日常生活中找回今日年青人的生活習慣，最好衣著也保持年青，別覺得自己老了就要穿得成熟，點解60唔可以變韓仔先？要別人覺得你年青，先要自己唔好認老。

離開單身

有否發覺，單身人士比起有愛侶的人，較為容易變老？因為單身人士生活較為單調，對生命的追求不足，但有愛情滋潤者，經常為了讓對方快樂而激發新思維，而且兩人一起生活到某些階段，就要思考、計劃及追求新目標，例如要準備結婚，之後要計劃生小朋友等，人生路較為豐富多變，有助維持年青的感覺。

聽高官講話

一個人變老，因為他對身邊事物提不起興趣，沒有喜也沒有惡，心裡那團火早早熄滅，準備入土為安。要給生活帶點火氣，最簡單直接做法就梗係聽下高官的說話，真係鑊鑊新鮮鑊鑊金，愈聽愈令人火滾，睇下維園阿伯中氣十足，就知道這個方法幾咁有效。