無論工作或生活，負責任唔係人人都做得到的事。但做人又豈能完全不負責任呢？為了減少負責任，我們只好想盡千方百計，尋求種種卸責藉口，期望將責任推得一個得一個。

搵食啫

子華神講過，香港地搵食係大過天，面對任何問題，只要推說是搵食，對方真係冇你符。不過，「搵食啫」對低下階層的人卸責才合用，因為大家都知他們確實可能唔搵就冇得食，但對於一眾唔搵都有排食的高層領導人，咁講只會俾鬧得更重。

我想架？

子華神又講過，「我想架？」係百搭，面對任何問題、質疑、責罵，一句「我想架？」，就能夠表達自己有那麼無奈被逼。但「我想架？」也具有撒野的意味，是乞人憎的卸責藉口。

敏感度不足

目前最富時代氣息的狡辯說話，這種說法代表自己不承認有錯，純粹有些地方不夠細心，一時大意，但這絕不是錯，千祈唔好誤會。

做法有改善空間

另一個近來說聽到的卸責藉口，又係沒有直接承認錯誤，只係處理上做得不足，未能令所有人都感到滿意，是處理手法未臻完美，日後可以做得更好。

表達或處理有誤差

與上述兩個藉口可成為一個系列，同樣以旁敲側擊形式將核心問題輕輕帶過，沒有直接回答質詢，一直在避重就輕。

咁做都係為你好

這句說話多出自家人、朋友或情侶之間，當一方發現另一方做錯，做錯的那一方就會這樣說，以感情作為擋箭牌，推說一切錯事都是為了愛，是為你而做，你覺得不好就是你不領情。

你唔明白我

這句都係做錯事的人，面對與自己有感情瓜葛的人時很喜愛用的藉口。說對方唔明白自己才「以為」自己做錯，變相將個問題轉移在對方身上。更甚者是當對方要求解釋時，再加多句「你真係了解我就唔會要我解釋！」足以讓對方啞口無言。

問題核心唔係有冇錯，係之後有冇改善

記得《大時代》中丁蟹殺了方進新後接受審判，他對陪審員說過「件案重點唔係我有冇殺人，係浪子回頭金不換」，這種丁蟹式常用的卸責方法，很多人都喜歡用，將責任輕輕帶過，說自己之後會改善，就當作結案陳詞。