自從疫情開始後，唔少返Office嘅打工仔，或多或少都試過Work From Home，亦享受過慳搭車時間、慳食飯錢等好處，相信如果有得揀，就算疫情過去後都應該有唔少人會繼續揀WFH。不過根據德意志銀行 (Deutsche Bank) 嘅研究，就話WFH其實係會對經濟造成負面影響，所以WFH嘅人應該要交返5%「WFH稅」喎。

根據德意志銀行嘅研究，「有幸」WFH嘅人「脫離面對面嘅世界，但依然過住充實嘅經濟生活」，同時又因為佢哋唔使返Office，所以唔使搭車、買飯，「對經濟架構嘅貢獻少咗，但就繼續享受福利」；另一邊廂，有啲工種例如廚師、送貨員、職業司機等係冇辦法WFH，但佢哋嘅收入又好可能因為你WFH而少咗，所以德意志銀行就提出，應該向WFH嘅人，於每個WFH嘅工作日，徵收其日薪5%嘅「WFH稅」，而如果員工WFH係因為公司冇提供辦公室，份稅就由公司交。

據德意志銀行估計，如果真係收5%「WFH稅」，一個年薪35,000英鎊 (約HK$36萬)嘅人每WFH一日，就要交7英鎊 (約HK$70)嘅稅，佢哋話同正常返工嘅使費其實差唔多。而收集到嘅稅款 (據估計，英國WFH稅總數為69億鎊)，就可以用黎資助低收入人士。