日本疫情近日越見嚴重，今日 (17日)確診數字為822人，係繼琴日 (16日) 678個確診個案後，連續兩日創下單日確診數目新高。而且由於確診人數越黎越多，對都內醫療機構造成巨大壓力，東京都將「醫療提供體制」嘅警戒級別提升至最高級嘅紅色，係疫情出現後嘅首次。

圖片：日經

據《NHK》報導，過去一個星期內東京都有超過2000名肺炎病人入院，令都內醫療系統瀕臨癱瘓，已接近無法處理一般病人嘅程度，專家於今日中午開完會後，決定將提升「醫療提供體制」警戒，表示情況已經非常緊急，如果唔能夠增加人手資料以應付呢個情況，又或者情況持續至月尾，醫療系統會出現「嚴重故障」，並「可能會嚴重影響保健所運作」。

東京都已於11月19日將都內「疫情警戒級別」提升至最高級嘅「紅色」；而「醫療提供體制警戒級別」自半年前就已經處於次高級別，今次係首次提升至最高級。