好似每個男人都有鋪收藏癮，有人鐘意儲錶、酒、相機、古董、鞋、模型、鞋等，數都數唔曬。而億萬富翁Roman Abramovich同你我一樣，都係鐘意收藏，差在佢啲收藏貴啲同大份啲。

（圖片截至：福布斯）

據福布斯資料，現時Roman Abramovich身家有140億美元，係俄羅斯第二大綱鐵生產商Evraz最大股東，以及英超球隊車路士（Chelsea FC）班主。當然仲有唔少「玩具」，超級遊艇、私人飛機，一大堆超跑同數唔曬嘅豪宅。《華爾街日報》曾用佢個名「Roman」抽水，笑佢嘅收藏組合係「The Roman Empire」，我哋一齊睇佢個「玩具箱」有幾奢侈。

（圖片來源：AFP）

喺2003年佢用2.33億美元買入車路士，當時外界稱佢係一個「熱心足球迷」，咁佢又真係成日去睇車路士比賽。直到今時今日，車路士已經係世界第6貴足球隊，價值約25.7億美元。

近年用大約5億美元買入世界第大三遊艇「Eclipse」，據說擁有2個直昇機坪，24間客房、兩個游泳池、大型舞廳同埋導彈防禦系統，需要多達70名員工維持遊艇運作。

佢有好多部私人飛機，其中比較出名嘅係一部訂制波音767-33AER，入面有廚房、辦公室同睡房，仲有一個可以坐到30人嘅宴會廳。

講完海同空嘅玩具，當然有陸上玩具。包括全球限量29部嘅「Ferrari FXX」、限量15部嘅「Pagani Zonda R」、「Bugatti Veyron」、「 Mercedes AMG GT3」、「Aston Martin Vulcan」。

除左周圍買豪宅，仲喺加勒比海島「St. Bart's」擁有大約28公頃（參考：維園19公頃），價值9000萬美元房產地，分別有網球場、別墅、游泳池、音樂廳，差唔多你諗得出嘅佢都有。

（圖片來源：Reuters）

佢曾經有過三段婚姻，加埋總共有7個仔女，雖然每次離婚都會被前妻鬧上法庭「分身家」，但最後只需「割愛」賠返幾棟別墅就和解，毫不影響佢富豪地位。