日本嘅職場文化一向都非常守舊，所以當疫情開始時，好多日本公司都要求員工們繼續返Office，直到近來先有越黎越多大企業容許員工「Work From Home」，都算係頗為「落後」。不過隨住疫情持續，日本就有望進一步推行更現代化嘅上班模式，未來更有可能推行「一週四天工作」制。

據日本傳媒報導，千葉縣參議員兼日本「青少年育成及少子化擔當」大臣豬口邦子將提出新議案，容許日本員工選擇一週工作四日，換言之有三日週末放假。據報目前日本Microsoft及瑞穗銀利 (Mizuho) 都已經實行緊類似政策，而假若議案獲得通過，日本政府將向實施「四天工作」嘅中小企提供財政緩助。

據豬口邦子講，四天工作唔單止有助控制疫情，亦有助員工照顧家中小孩及長者、進修又或者創辦副業。

雖然「四天工作」能夠令員工保住份工之餘有更多私人時間，但當然亦有其他附帶條件。其中最重要嘅就係目前實施「四天工作」嘅企業，都只會8折出糧，部份企業提供「三天工作」更只會6折出糧。假如日本政府議案都係咁安排，對於收入本來就唔高嘅中低下階層黎講，可能就會情願返多日工搵多啲錢算數。

另外日本打工仔OT頻繁亦係常識，當你一個星期返五日都仲要日日OT，一個星期返四日就只會更加辛苦，反而可能對員工嘅身心造成更大影響。

不過目前議案只係提出一個新選擇予員工，員工可以因應自己嘅需要選擇最適合嘅工作模式，咁樣有得揀都總好過冇得揀嘅！