每個成功嘅男人背後都有一番奮鬥經歷，Twitter共同創辦人兼CEO Jack Dorsey都唔例外，據近日CNBC報導，原來Jack Dorsey曾經想離開科技業轉行做時裝設計師。今年44歲嘅Jack Dorsey，現職Twitter及電子支持公司Square CEO，身家高達130億美金。但原來喺2006年創辦Twitter之前，佢只係一位興趣廣泛嘅曾通矽谷工程師。

Twitter創辦人之一 Jack Dorsey

其實早於2000年開始，Jack Dorsey已經構思緊整個實時狀態更新嘅網絡平台，正正就係Twitter嘅雛形。但由於當時做工程師做到無咩突破同成功感，所以一直都喺繼續做工程師或轉行別闢蹊徑兩個念頭入面搖擺不定。

你又點估到一直被人覺得「毒」嘅工程師，竟然係時裝設計愛好者。

Jack Dorsey當年喺紐約大學臨畢業前一個學期選擇輟學，去咗加州奧克蘭成立的士及快遞服務派遣公司，做咗幾年就因為同董事會成員意見不合被人炒魷魚，返番家鄉聖路易斯。被人炒魷嘅Jack Dorsey，返家鄉後開始研究各種興趣，包括植物插畫同按摩，同時又非常著迷時裝設計。佢非常欣賞牛仔褲設計師Scott Morrison（牛仔褲品牌Paper Denim & Cloth創辦人）嘅作品，得知Scott Morrison鍾意有人物繪畫技能嘅設計師後，Jack Dorsey仲特登報讀相關課程，希望藉此可以加入做設計師。

Twitter成立創期，Jack Dorsey仍然不斷鑽研時裝設計。

直到2006年創辦Twiiter初期，Jack Dorsey都有一直Keep著去設計學校上時裝設計課程。據了解，當時Jack Dorsey每日6點左右就會離開Twitter辦公室，去上畫畫班、熱瑜伽及時裝學校課程。Jack Dorsey曾經喺設計學校入面設計過「鉛筆裙（pencil skirt）」同「不對稱裙（asymmetrical skirt）」，可惜最後都掉咗，大家無緣睇到佢作品。即使最終Jack Dorsey無成為時裝設計師，但從佢平時著嘅衫可以見到佢仍然對時裝設計抱有濃厚興趣。喺出席2019年巴黎時裝週嗰陣，就被發現所著嘅衫係前衛設計師Rick Owens嘅作品。