天星小輪大家就成日搭啦，大家又有無諗過住喺上面？幾年前有位外藉富商買入天星小輪改裝成豪華遊艇，當時唔少人都非常好奇究竟改成點樣。最近佢就因為要移民所以出售，船內奢華裝潢因而曝光。

（圖片截至：Asia-Pacific Boating）

據了解，船主喺2011年買入天星小輪退役渡輪「金星號」，並委託青衣梁穩記船廠畫圖則，送到珠海船廠展開長達18個月嘅改裝，變成大家依加睇到嘅豪華遊艇「DOT」。

（圖片截至：Asia-Pacific Boating）

船主更搵嚟一位法國室內設計師幫手設計船內裝潢，當中6000呎為生活空間，4000呎為儲存空間。總共有4間客房，每間房都有獨立淋浴室，而且船上另設有私人戲院、書房、辦公室、開放式廚房，起居飲食娛樂設施應有盡有，簡直就係「海上豪宅」。

除咗裝潢豪華，船上更設有海水化淡機及太陽能發電板，具備57,000升蓄水能力，絕對可以自給自足。雖然船頂鋪滿太陽能板，無得訓喺上面曬太陽，但就有個亭可以坐係入面飲返幾杯欣賞風景。

由於船主因為打算移民返歐洲，所以出售呢隻豪華遊艇，售價為2100萬港幣，都同唔少市區千呎樓盤差唔多嘅，不過呢啲機會...就係屬於讀者們！