雖然Apple冇開發遊戲，又唔似其他公司有自家遊戲機，但單憑旗下App Store向遊戲商「抽佣」，就足以令遊戲業務收入力敵一眾主流遊戲公司。據《華爾街日報》分析，Apple喺2019年就以85億美元遊戲業務利潤，超越任天堂、微軟、動視暴雪及Sony四大巨頭同期遊戲收入總和嘅65億美元。

點解Apple遊戲業務收入咁高？關鍵在於Apple會對App Store嘅遊戲及應用程式抽成15-30%（俗稱蘋果稅），試諗下Epic Games嘅《Fortnite》、騰訊嘅《王者榮耀》以及《原神》等吸金量極高嘅熱門遊戲，玩家每次「App內消費」都抽返30%，其實唔難理解Apple點解可以唔出遊戲，但遊戲業務收入可以多過各大遊戲巨頭總和。

上年遊戲開發商Epic Games就因為不滿Apple「食水太深」，於是喺旗下熱門遊戲《Fortnite》加入第三方渠道等玩家繞過App Store課金，結果Apple立即將遊戲下架，雙方鬧上法庭對簿公堂。