近年熱衷環保議題嘅Microsoft創辦人Bill Gates，認為隨住世界各國逐漸遠離化石燃料，改用更乾淨及可再生能源，未來石油巨擘將會陷入困境，部份公司股價或變得一文不值。

2021年聯合國氣候變化大會（COP26）目前喺蘇格蘭格拉斯哥舉行，多國元首及商界領袖聚首一堂，為減碳及氣候問題出謀獻策。據外媒CNBC報導，Bill Gates日前就喺會上指出，隨住再生及潔淨能源日益普及，認為主導市場超過一世紀嘅石油巨擘將會陷入困境，並預言「30年後，部分石油巨頭會倒下，甚至變得一文不值。」

另外，Bill Gates同時認為大型石油公司要向再生能源轉型先有生存機會，而佢亦都喺新書《How to Avoid a Climate Disaster》提及過，旗下嘅蓋茲基金會早喺2019就冇再持有天然氣及石化公司嘅股份。雖然再生能源確實係全球大趨勢，但會唔會好似Bill Gates「預言」所講仍然係未知之數，正如30年前大家都估唔到依家咁興電動車啦。