太空探索公司Blue Origin及Amazon創辦人Jeff Bezos，日前出席論壇時就作出比Elon Musk「殖民火星」更大膽嘅猜想，認為人類未來會移居到飄浮於太空嘅殖民地，地球就變成偶爾造訪嘅渡假勝地，唔通佢都有睇高達？

圖片：REUTERS/Katherine Taylor

日前Jeff Bezos出席位於華盛頓舉行嘅伊格內修斯論壇（Ignatius Forum），大談未來太空殖民願景，佢認為再過幾個世紀，人類將會從太空殖民出世並成長，而地球就會變成自然保護區，到時前往地球就好似依家我哋去黃石國家公園旅行一樣。

至於太空殖民地嘅具體細節，Jeff Bezos就話佢旗下嘅Blue Origin將會協助興建圓柱體形狀、環繞地球軌道嘅太空殖民地，並模擬出地球嘅天氣及重力，入面唔單只有城市，仲有森林河川同埋野生動物，簡單嚟講即係好似《高達》嘅殖民星咁樣。另外，佢亦不忘暗串一下競爭對手Elon Musk，表示即使將火星成功改造，變得適合人類居住，頂多都係容納到地球2倍人口，反而佢個「太空殖民地」方法就冇人口上限。