早前同大家報導過，Amazon創辦人Jeff Bezos豪擲近5億美元委託荷蘭船廠製作一艘長達400多呎嘅超級遊艇。然而，呢艘遊艇實在太巨型，冇辦法通過一座擁有145年歷史嘅古橋，於是Jeff Bezos就出錢建議當地政府拆橋放行再重組，引起民眾熱議。

綜合外媒報導，Jeff Bezos新遊艇「Y721」由荷蘭船廠Oceanco製造，全長418尺(約127米)，擁有3支高達131尺(約40米)嘅桅杆，預計今年內完成組裝後，就會喺市鎮Alblasserdam正式下水經由河道出海。但由於遊艇太過巨型，無法通過河道上嘅科寧斯文大橋（The Koningshaven Bridge），於是船廠建議當地政府暫時拆橋放行，然後再重新組裝，費用全由Jeff Bezos負責。

經過當地政府從維持就業及經濟角度再三考慮後，最終接受船廠建議，決定暫時拆除大橋中間部份讓船隻通過。但由於呢座古橋早於1878年建造，經歷過二戰被炸毀後再重建，歷史悠久兼意義重大，而且當地議會先前亦承諾過未來唔會拆除，所以當地唔少市民對市政府嘅決定非常不滿。有民眾就喺Facebook舉行一個名為「Throwing eggs at superyacht Jeff Bezos」嘅活動，計劃約埋一班人喺橋邊向Jeff Bezos隻船掉雞蛋，目前已經有超過900名用戶表示參加，唔知最後搞唔搞得成呢？