各位每日返工，都一定會有唔少嘅工作要完成，但大家嘅習慣會係無論幾時都出盡全力儘快完成工作，定係死到拖到收工前先完成？日本網民「のぶ@学校のモヤモヤ代弁 @talk_Nobu」日前就喺Twitter分享兒時經歷，話佢小學三年班時就已經知道，提早完成工作其實冇著數！

小学生のとき
私「掃除終わりました」
教師「まだ３分余ってるぞ」
私「もうキレイです。終わりでいいですか？」
教師「本当か？やれることを探して、時間いっぱい掃除するんだよ！」
と怒られて以降、時間ピッタリで終わるようにダラダラ掃除してた。頑張ると損する制度は、ずっとおかしいと思ってる

— のぶ@学校のモヤモヤ代弁 (@talk_Nobu) April 23, 2022

事情係咁嘅，@talk_Nobu上月分享自己小學三年班時，打掃班房嘅經驗。佢話有一次佢提早完成咗自己負責嘅部份，於是就去同老師講「我搞掂啦！」，而老師就話「仲有3分鐘先夠鐘」，於是@talk_Nobu就回答，「我已經做得好好啦，可唔可以提早走呀？」結果老師就鬧佢：「係咩？咁你應該搵其他嘢黎打掃，掃到夠鐘為止！」

@talk_Nobu話由嗰一刻開始，佢就學識原來提早做哂啲嘢係唔會有著數，仲可能要做更多嘢！所以往後佢都一定拖到最後一刻先完成自己應該要負責嘅工作

佢嘅呢個經歷引起日本Twitter網民嘅熱烈討論，帖文獲得超過15萬個讚好、近2.5萬個留言。大部份人都非常認同推主嘅想法，認為「提早做哂自己嘅本份，反而要做更多工作」係唔合理；好多人亦分享佢哋依家工作時，都係抱住同樣嘅心態拖到最後一刻先完成；同時有人認為要人夾硬拖長啲嘢黎做，其實係毫無意義可言。

另外有人提出好多公司對「做足工時」有嚴格要求，所以唔容許員工遲到，但對員工OT卻視若無睹；亦有人認為呢種「職場生存法」係出社會工作後必須面對，甚至比起你對工作本身有幾熟手更重要。唔知大家又有冇呢個「拖到收工」嘅習慣呢？