經常以人口眾多而自豪，號稱「所有問題除以14億都不是問題」嘅中國，近年就迎來人口問題。繼早前中國國家統計局公佈2021年人口僅增48萬後，近日官媒《環球時報》就引述一名高級衛生官員指出中國多個省份於2021年嘅新生嬰兒數目都創新低，預計總人口將會於2025年開始下跌。

中國官方於星期日發佈2021年出生數據報告，顯示有多個省份嘅新生兒數目創下數十年來嘅新低。據《環時》引述中國國家衛生健康委員會人口監測與家庭發展司長楊文莊指，湖南省嘅新生兒數目60年內首次降到50萬以下，而《第一財經》就報導指安徽省新生兒數目於2017至2021年間「斷崖式」跌咗47.6%。據報目前只有廣東省嘅新生兒數目有超過100萬名，估計全國總人口會於2025年前開始萎縮。

而《Reuters》就報導指，雖然中國近年放寬生育政策，例如容許生「三孩」等，但對人口萎縮嘅大勢冇幫助，好多中國女性都表示政策改變黎得太遲，亦冇足夠嘅工作保障以及性別平等去支持生育。而據聯合國於7月11日公佈嘅《世界人口展望2022》報告，印度人口將會於2023年超越中國，成為世界第一人口大國。

資料來源：Reuters、美國之音