早年中國經濟起飛，城鎮人口收入增加，令一眾年輕人炫富成風。不過近年因為疫情、中國嘅清零政策、美國制裁等多方原因，令中國經濟增長大幅放緩，同時年輕人失業率亦創新高，據《Reuters》報導，目前中國年輕人一改過往大手大腳嘅消費模式，「節儉」成為新潮流，同時亦令中國消費力大減。

據《Reuters》報導，中國大城市近來掀起一股「節儉風」，例如小紅書上出現「10元晚餐」、「在上海用1,600元生活」等大量「慳家教學」；佢哋亦訪問咗一位黎自上海嘅市場營銷顧問Doris Fu，佢話自己依家唔整指甲、唔Set頭、連化妝品都轉哂用國產牌子，熱愛電影嘅佢以往每個月入場睇兩次戲，但自從疫情開始後佢就冇入過戲院。

據中國人行公佈嘅數據，16-24歲嘅「城鎮青年」失業率今年屢創新高，由3月嘅15.3%升到7月嘅19.9%，最新數字稍為回落至18.7%，但仍意味有近五份一城鎮年輕人目前係失業。

另一邊廂，中國政府近來不停針對科技業，加上美國制裁令中國科技公司發長進一步受限。過往一直蓬勃發展嘅科技業，正正為年輕、受教育嘅年輕人提供高收入工作，但目前絕大部份中國科技公司都處於裁員狀態，而年輕人往往就係第一批被裁嘅，就算冇被炒魷都可以面對減薪，令中國年輕人失業率高企、收入下降，繼而由以往積極消費，改為節儉過活。

《Reuters》特別提到，中國GDP有近半都係靠消費市場支撐，如果民眾轉向儲蓄、投資，將會進一步影響中國經濟增長。