「我爸是李剛」呢句嘢相信大家都有聽過，但你又唔好以為用自己位高權重嘅老豆黎兇人，係北方某國嘅特色，事實上大家非常推祟嘅英國亦有人曾經講過類似嘅嘢，而且仲係更加把炮嘅「我老豆係國王」——而講呢句嘢嗰個，就係今年9歲嘅「王太孫」佐治王子。

圖片：Wireimage

據近排出咗本新書《The New Royals》、同時又係美國《Vanity Fair》「王室組記者」嘅Katie Nicholl爆料，佐治王子曾經喺學校，向一個玩得太過火嘅同學講：「我爸爸會做國王，你最好小心啲呀！」據報威廉王子一直希望自己嘅小朋友可以於「正常家庭環境下長大」，「與現代社會接軌」，所以刻意避免同子女談及佢哋嘅王室身份，又或未來嘅頭銜。而佐治王子亦係大概7歲時先大概知道爸爸、以至佢自己未來都有可能做英國國王。

圖片：Gelderlander

而年幼嘅佐治王子目前似乎就唔太理解國王頭銜背後嘅含義同責任，對佢黎講「國王」純粹就係一件好勁、好把炮嘅事，所以就拎咗黎做同朋友鬥咀時嘅「必殺技」。另一邊廂，據知佐治王子嘅細路妹，包括今年7歲嘅夏洛特公主以及4歲嘅路易王子就相對更理解王室嘅責任。

資料來源：newshub