世界上每一份工都有其不足之處，可能係啲同事、上司好難相處；又可能係工時太長，工作量太多；可能係公司冇咩晉升機會或者前景；又甚至係公司距離自己屋企太遠、附近冇咩好食等。不過相信絕大部打工作都會同意，每份工嘅最大問題都係「人工太低」，而近日日本一個職場調查，就發現日本打工作都係咁諗！

日本求職網站「Next Level (ネクストレベル)」早前進行咗一個職場調查，搵黎近300名來自各個年齡層、業界嘅日本打工仔，睇下佢哋對目前嘅工作有咩不滿。結果就發現，有高達37.2%受訪者認為自己份工人工太低，遠遠拋離第二名嘅「公司內人際關係」。而「人工太低」亦係所有年齡層中最多受訪者表示不滿嘅地方。

而除咗「人工太低」之外，所有年齡層嘅受訪者都將「公司內人際關係」以及「公司將來、工作穩定性」列入對工作不滿的頭五位內，其中較為年輕嘅打工仔會更重視人際關係，而較年長嘅打工作就重視公司嘅將來。另外「缺乏工作動力」亦係常見嘅不滿地方之一。

高達54.1%受訪者表示，當工作上遇到不滿時，會選擇同身邊嘅「呻」，而聆聽對象就通常係「家人 (38.8%)」、「朋友 (19.8%)」以及「同事 (15.5%)」。亦有50%受訪者表示遇到工作不滿時會嘗試去搵工——實際上同一個調查亦發現，有73.3%嘅受訪打工仔表示有諗過辭工，而當中有38.2%人表示只係因為「要搵食」所以先繼續做。

睇黎無論日本定香港嘅打工仔，都係面對緊類似嘅問題呢。

資料來源：maidonanews