由細到大，大家都聽人講「錢唔係萬能」、「錢買唔到快樂」；但到你大個出社會，你就知道「無錢萬萬不能」、「無錢就好難快樂」。咁究竟錢能夠買到啲咩呢？近日有網民用Elon Musk嘅舊照整理出佢歷年嘅外貌變化，對比之下雖然都係唔知錢買唔買到快樂，但就似乎買到頭髮。

卻說YouTube頻道《Yubro》及《OneData》早前分別做咗一條利用網上照片整理而成嘅「Elon Musk歷年外表變化」影片，當中《OneData》條片有齊Elon Musk 52年黎嘅相，而《Yubro》雖然冇咁齊全，但就加入咗當時佢嘅身家數字。雖然照片及數字未必完全準確，但就清楚可以發現Elon Musk嘅髮量於大學時間進入鼎盛，然後於90年代中後期，佢27、8歲首次創業，創辦Zip2後開始明顯下跌，到1999年佢出售Zip2賺到第一桶金、並創辦Paypal前身X.com（後來買返黎做Twitter網址）時進最低潮，兩邊額角禿到接近頭頂，頭頂嘅髮量亦相當稀少。

有趣嘅係，隨住佢於2002年出售Paypal、創立SpaceX，2004年加入Tesla之後，佢嘅髮量就隨住身家慢慢回升。尤其進入2010年代尾，佢步向世界首富開始，更可以話係擁有一頭濃密嘅頭髮（雖然個額都係高），並一直維持至今。

由於變化幅度非常明顯，所以唔少網民都於影片下方留言指「佢51歲啲頭髮仲多過15歲嗰陣」、「證實：錢係買到頭髮嘅」。有人仲大讚步向中年嘅Elon Musk比20歲時更靚仔。