「錢買唔到快樂」呢句嘢，相信大家都聽過唔少次。過去亦曾經有研究指出，隨住收入上升，人嘅快樂水平雖然會增加，但收入到達某個水平後，快樂增幅就會放緩甚至不變，換言之錢能「買」到嘅快樂只會持續到某個收入水平。不過近日一個新研究就推翻咗呢個結論，發現錢唔單止買得快樂，而且不存在限制、越有越錢就越快樂。

話說美國賓夕凡尼亞州大學嘅Matt Killingsworth早前公佈咗一個研究，指佢收集咗超過3.3萬名年齡介乎18至65歲、年收入至少有一萬美金嘅人嘅人生滿意度，同時又另外收集咗一群擁有至少300萬美元資產嘅「超有錢」嘅人生滿意度。結果發現受訪者嘅人生滿意度不單止隨收入增長，而且有錢人與中產人士（年收7至8萬美金）之間嘅滿足度差異，比起中產與低收入人士嘅滿足度差異更大，換言之錢唔單止無止境地買到快樂，而且越有錢嘅人，快樂增幅就越多。連Matt Killingsworth本人都表示對於有錢人與低收入人士嘅快樂程度差距感到驚訝。

但之前唔係話有研究指錢去到某個水平（約年收7.5萬美金）就買唔到快樂咩？呢個結論其實係由普林斯頓大學嘅Daniel Kahneman 及Angus Deaton於2010年提出。而2023年時同樣來自賓夕凡尼亞州大學嘅心理學系教授Barbara Mellers，就聯同Matt Killingsworth及Daniel Kahneman再次審視兩個研究，結果發現兩個研究都冇錯，但準確黎講2010年嘅研究中量度嘅其實唔係「快樂程度隨收入增加」，而係「不快樂隨收入增加而減少」。換言之，就即係收入達年7.5萬美金前，收入越高你就越少不快樂；收入到達7.5萬美金後，雖然不快樂唔會繼續減少，但其他類型嘅快樂就會增加，而且越有錢就增加得越快。

再簡單啲，就即係「錢買得到快樂，而且無錢真係好唔快樂」。

資料來源：Money and Happiness: Extended Evidence Against Satiation、High income improves evaluation of life but not emotional well-being、Income and emotional well-being: A conflict resolved