圖中呢位先生，叫「野々村竜太郎」，是日本兵庫縣的一位議員。話說佢早排比人爆出上年以公帑支付了300萬日元（約港元22.8萬）交通費前往四個不同地點共195次，其中有106次仲要係去同一個溫泉度假場，即係平均每3日半就去一次，睇黎呢個溫泉度假場真係好好玩喎！

比人踢爆唔緊要，佢仲走出黎公開交待；交待都唔緊要，仲交待到喊！你睇佢喊苦喊忽個樣幾咁肉酸！不過呢，阿媽都有教，男人喊係解決唔到問題，貢樣笨唔係辦法，據報佢亦已喺今日（11/7）較早時間向縣議會議長辭職，而縣議會議長亦喺下午5點幾公布接受佢辭職，好嘞！議會內各派已發表聲明， 促請有關方面進行刑事調查，之後，睇嚟大把香艷嘢、大鑊嘢陸續發放，嫌香港立法會未夠激，想轉轉口味，就要睇實呢單新聞。

若然同樣嘅事情發生係中國，區區廿幾萬港紙你就比人踢爆嘅，你呢個幹部大極都有限啦！仲話下台辭職喎？我地香港有個廉政專員，在位期間淨係返大陸嘅「個人開支」都用左76萬、買牛雜都使千幾銀，岩岩出個報告都係比人話兩句「行為不當」咋，事後佢自己仲走出黎話個報告「還佢公道清白」！條友仔個個月仲拎緊6萬銀長糧架！全身而退仲彩都拎埋，呢啲咪叫文明昌盛囉！下？乜日本冇嘅咩？哎唷我仲以為日本好開明添！

如果你問呢條片有咩教育意義，我就會話佢嘅敬業態度！人地起碼叫喊到面容扭曲、七情上面呀！香港官員（及其家屬）啲演技就真係「令人倒抽一口涼氣」啦！