文: MenClub 路兒

如果你對Nokia嘅印象，仲停留喺3310之類比地殼更強硬嘅堅固外殼（仲有貪食蛇玩），咁少年你就太年輕了。Nokia自2016年向芬蘭公司HMD global Oy授權生產手機後，接連推出了數款Android系統手機，大走親民路線；日前登場的全新旗艦手機Nokia 8，前後鏡頭均搭載蔡司鏡頭，支援4K拍片，加上頂級規格，而價錢都不過是599歐元（折合約$5,510港元），大家會唔會心思思想入返部玩吓蔡司？

Nokia與蔡司並唔係首次合作，早於2005年推出的Nokia N90已有內置蔡司鏡頭。今回Nokia 8機身採用一體成形設計，鋁質外殼作打磨鏡面處理，仲號稱每部都要經過40道嚴格的加工、陽極氧化和打磨工序，媲美格雷的五十道色戒。新機配備5.3" 2K屏幕，比主流的大屏手機稍稍窄一點，但相對自然輕薄一些，厚7.9mm，重160g，各有所得。

入返戲肉，Nokia 8最大賣點相信係前後鏡頭均配備F/2.0 光圈1,300萬像素蔡司光學鏡頭，仲支援4K拍片，及Nokia OZO 360°空間音效錄音，令影片聲色俱全咁話。此外新機更加入雙向拍攝模式，可以兩個鏡頭同時影相或拍片，自拍同時影女無難度，等用家唔使一個自拍咁孤獨。

Nokia 8其餘規格都屬旗艦機級別，內置Qualcomm Snapdragon 835處理器、4GB RAM、64 GB內置記憶體、3090mAh電池，支援外置microSD 卡、雙SIM卡（不過就不能夠同時間插兩張SIM加microSD卡，你懂的）、USB Type C充電。新機預計9月初全球開售，備精磨藍、精練藍、合金鋼、精磨銅四色，定價599歐元。唔少人會將Nokia 8拎嚟同有Leica鏡頭嘅Huawei P9、P10相比較，單看規格，前者好似差少少；之但係Leica獨特的奶味，同蔡司根本唔同，實際如何，就要睇試相先知啦。