YouTube換新設計　手勢控制睇片更方便

文：MenClub 路兒　　圖：互聯網
POSTED ON 30 Aug 2017

成日上YouTube睇片聽歌的話，可能會留意到YouTube個標誌靜靜雞換咗新裝，唔再係白色「You」加紅色方形「Tube」，而變成Play掣加「YouTube」字樣。新標誌原來蘊藏好多設計心思，而除咗標誌大革新之外，手機App版介面亦有更新，將唔少桌面版功能移植過來，仲加入手勢控制方便操作，夠貼心。

品牌標誌設計重來都唔容易，睇Instagram換logo後劣評如潮就知。唔講唔知道，原來舊YouTube標誌上嘅字體係用緊一款1903年嘅字體，名叫「Alternate Gothic Number Two」，而且標誌上嘅「u」仲改動過，同原本字體裡面嘅「u」唔一樣。設計新logo時，團隊就決定棄用舊字體，自行設計新字體，採用印刷字體風格。連新標誌裡面嘅Play掣，顏色都換成RGB原色#FF0000，四個角的孤度都唔同，自問對設計美學素有要求或者心思細密嘅你又睇唔睇得出？

除咗標誌，YouTube亦有幾項介面設計更新。其一是更新後，手機App版的主選欄將由頂部移至底部，方便大家單手操作。桌面版快播、回帶、1.5/2倍速等功能亦相應移植到手機版，睇片時Double Tap點按兩下就可以選擇功能，例如畫面左邊點兩下就係回帶、右邊點兩下就係快播，相當方便。另外YouTube亦會支援播放近期大熱的直向影片，以及喺全屏幕播放時加入推薦影片。

至於桌面版亦有更新，加入黑色主題，有型得嚟襯返Material Design咁話。詳情可以睇睇以下官方介紹片。