1. 撞樣易解鎖？

Craig Federighi台上甩轆，外界斷估係佢唔記得咗iPhone重新開機後要入密碼先用得。不過大家都好關心，韓國啲女女會唔會開唔到機架？1號至100號人造人全部撞樣架喎！人造人就真係難講啦，視乎用咩眼耳口鼻同醫生手勢啦；但發布會上Apple官方就提到，如果你有個同卵雙生嘅孖生兄弟姊妹，即係超似樣果啲，建議唔好單靠Face ID，用埋密碼安全啲。換言之兩個人九成似樣如孖生的話（或者孖樣人造人？），用Face ID撞入開到鎖嘅機會大過一般人，唔想被偷睇手機就要Set密碼。

2. 合埋眼開唔到？

有人擔心用Face ID會瞓覺時畀老婆/女友偷偷地拎部機去解鎖，咁就mola mola。查實Face ID要用家對眼睜開，望住部機先可以解到鎖。有人擔心對眼太細會唔會解唔到？Face ID用上30,000點紅線3D掃描，除非你對眼好似小剛咁細，唔係都好難開唔到。不過都係有風險，萬一有人執到部機，一野隊去你面前，話唔定都可以屎忽撞棍解到。

3. 安全啲咩？

賣花緊係要讚花香，Apple話根據數據統計，Touch ID被撞中嘅機會係5萬分之一，但Face ID被撞中嘅機會只有100萬分之一（不過孖仔孖女另計）。大家都會擔心用Face ID等於將自己樣貌資料交晒畀Apple同美國佬。Apple聲明Face ID同Touch ID一樣，資料只會儲存喺手機上，唔會傳送上雲端，資料亦會由secure enclave加密處理。

4. 換look照認到？

同Touch ID唔同，手指有十隻，但臉就得一塊。iPhone X內置嘅A11處理器勁就勁在識學習，戴咗眼鏡、帽、飾物或者留鬚，佢都一樣認得到，換咩look都得；而且可以喺黑暗中使用，熄咗燈都唔驚開唔到鎖。

5. 用相會解到？

暫時冇人試過成功。技術上，Face ID係用手機嘅TruthDepth前鏡頭，以30,000點紅外線3D掃描用戶塊臉，再由A11生物晶片配對。鏡頭亦會靠偵測皮膚同眼部活動，辨認係咪生物。有保安專家認為，紅外線3D掃描要用相破解比較難，但可能用3D打印模型都得喎，結果有待測試。