360相機早已風行，帶埋女女一齊影星球相呃like呢條橋幾時都唔會舊，上山下海野外露出......sor，露營，確係一流，可以一次過將女女同埋整片森林和原野盡攝入鏡。Ricoh最近推出新一代360相機Theta V，加入咗4K拍片功能，仲玩埋360音效，上上下下左左右右收音，聲音都有臨場感。

Theta V外型同Theta S相差無幾，同樣有前後兩枚f2.0 12M魚眼鏡頭，採用1/2.3" CMOS感光元件，運行Qualcomm Snapdragon處理器，ISO擴闊至64-6,400，快門去到1/25,000，激烈野戰中都影到。影片方面亦支援錄影4K/30fps 360影片，續航力足夠拍40分鐘4K片，支援H.264及H.265格式。今次內建儲存空間大增到19GB，透過手機App即時睇Live View預覽360效果，唔怕星球位縫唔準，影完亦可以即刻過落手機Send畀女女打卡。

試相：

機身前後及上下總共有四個收音咪，可以垂直兼水平3D收音，亦可以加插日本品牌Audio-Technica Corporation收音器，記錄更廣音頻。播放時音效就真正360立體感，配合VR裝置睇片的話效果就更真實。例如畫面見到女女左至右行埋嚟嫣然細語，聲音都會隨之由左至右而嚟，而當畫面擰轉條女變咗喺右邊行嚟，聲音亦會跟住改變方向，用耳筒聽就好明顯啦。

Theta V淨機身定價$3,890，配件方面Audio-Technica Corporation收音器售$2,290，仲有個可落30米水深嘅防水殼賣$1,690。畀個貼士大家，唔想星球相影埋自己隻手，可以加自拍棍用自拍Mode倒數定時影。