Apple推出iPhone X後全地球驚為天人，上至人臉辨識解鎖下至價錢統統都夠晒震撼。你拎Android各大旗艦機嚟同佢比，話小意思啦Android機都做得到，證劵行分析師就估計：「Android起碼要兩年半先追得到。」

專門研究Apple發展嘅凱基證劵分析師郭明錤原本估計，各大Android對手需要約兩年時間就可以追上Apple。但佢喺最新嘅投資報告中提到，喺2018至2019年，TrueDepth鏡頭將會為Apple帶嚟技術上嘅領導之位，將雙方距離進一步拉開；Android陣營要兩年半左右，先可以複製得到同樣嘅功能同使用者體驗。

雖然佢對iPhone未來幾年銷量都充滿信心，不過，佢仍然將2017年iPhone X估計出貨量由原本嘅4,000萬，調低至3,000萬至3,500萬，理由唔係因為需求下降，而係TrueDepth鏡頭生產同組裝問題會影響出貨量。Any肥，全因有TrueDepth鏡頭，佢對iPhone出貨量仍然抱「積極展望」，係咪明燈就大家自行判斷啦。