小米帶挈？腦舖轉型求生

文：MenClub Patrick　　圖：MenClub
POSTED ON 18 Sep 2014

iPhone 6開賣，先達又將變成炒家放機上大陸的轉運中心，零售手機？Who fxxking cares！相比先達的炒炒賣賣，深水埗高登至鴨寮街一帶手機舖做的，仍算是揼石仔的賣機實業。尤其係自從小米在香港大紅之後，本土人士想買小米產品，不少已捨棄先達而轉投深水埗，以致近一年來深水埗不斷出現掛着橙色「mi」招牌、專賣小米產品的店舖，在腦場生意愈來愈難做的形勢下，為一眾腦舖提供另一條出路。
這一年間深水埗多了不少主力售賣小米產品的店舖。
筆者粗略數過，高登、黃金兩大電腦商場，以至週邊的地方，標榜以賣小米產品為主的舖頭不下20間，而其中面積最大的，可算是坐落於黃金地面一間本名叫作「icon digital」的店舖。店內雖也有賣其他品牌的各式產品，但重點始終是一眾小米產品，足見小米真的可成為店舖的生招牌。
icon digital宣傳單張印的全部是小米產品。
電腦產品無肉食這間舖的老闆Victor Lin在深水埗腦場打滾超過十年，舖頭之前以售賣國產tablet與電腦週邊產品為主。但他眼見近年同場行家死鬥爛鬥，利潤愈降愈低，又踫上去年爆發的小米盒子熱潮，於是便由小米盒子開始，逐步轉為主銷小米產品，最終轉型到零售小米手機、甚至小米電視。「底板、Router嗰啲唔好計，就算最好賺嘅Notebook，賣一部咪頂多賺幾百蚊，但係而家又有Tablet又盛，仲邊有咁多人買Notebook？一日賣到一、兩部都偷笑啦，你計吓條數即係一日賺到幾多？大佬，黃金高登四正啲嘅舖都要幾萬蚊租啦，賣幾多部先賺得番？手機利潤唔會低過Notebook好多，但係一日賣十幾部都有可能，點都易維皮啲啦！」
Victor指現時最好賣的小米機是紅米Note增強版，行貨市價約為$1,399。最新的小米手機4，未出行貨，水貨到港後由原價約$2,500（RMB 1,999）炒到$3,300。
顧客想摸過先買不過，小米產品明明能在香港官網訂購，又不是每部機都永遠被「秒殺」到在網上買不到，這些「小米專門店」的生存空間又是從何而來？Victor這樣解釋：「香港人始終鍾意現買現賣，總係鍾意摸吓部機先安心買。尤其係用小米機嘅人，9成都係貪平，所以唔少係年紀大啲，或者老竇老母買畀仔女，呢班人冇後生仔咁信網上買機。」請Victor數他的舖頭自轉型以來最好賣的小米產品，他依然說是小米盒子。所以，即使已經炒完的小米機款，最終仍會因來貨價高而導致零售價比官網定價貴一點，都依然有不少人寧願去這些「小米專門店」購買。當然，若心急想買熱炒中的行貨，或者根本沒在香港正式推出的水貨，更一定要幫襯這些舖頭了。Victor還說，更因為現時深水埗有好多舖頭專賣小米的手機，所以不少想買小米機的人都會直接去深水埗，更有部分是上門前已經決定買哪一部，完全不用他們介紹。
早前csl.在九龍灣開了旗下首間小米專門店，Victor說客路不同，各有各做，對他的生意沒有影響。
其他廠開始鬥平由2011年第一代小米手機開始，多款熱門的小米產品，都由大陸喪炒喪搶到香港。去到上年小米正式在港推出行貨產品、小米盒子帶起「盒子熱潮」，以及定價$999的紅米手機登場，可算是整個品牌在香港的巔峰時期。到底這股氣勢可以維持幾耐？Victor認為還可持續一段時間，「最初小米啲機賣到咁平真係好爆，成功做到個勢出嚟，搞到人人一想買平機，都即刻話買小米。不過，而家Asus、Lenovo、華為啲機都已經愈賣愈平，小米開始要同佢哋競爭。」但既然已經轉型，Victor話即使日後不再集中賣小米產品，也能賣其他牌子手機，路，總會有的！

icon digital負責人Victor Lin