家陣嘅手機雙鏡頭已經係基本嘢，大家可能唔覺得有乜咁出奇丫；點樣先可以突圍而出？HUAWEI最新推出嘅HUAWEI nova 2i直頭畀夠前前後後四個鏡頭，等你自拍都可以玩景深，同囡囡自拍無難度！

雖然係中階機，但HUAWEI nova 2i都有住旗艦機風範，線條簡單俐落，金屬機身採用弧邊切割，睇落更有時代感，機背更設有指紋感應器。HUAWEI nova 2i配備5.9吋嘅FHD+ IPS超窄邊框，更加採用18:9窄屏幕比例，屏幕佔比有成83%，畫面更大，睇片打機就更爽。即使屏幕呎吋大左，但揸上手都一樣咁舒服。

最強賣點當然係前後都有雙鏡頭。HUAWEI nova 2i 配備13MP+2MP前鏡頭，內置人像模式，自拍都可以營造到散景效果，一秒變身攝影大師。當然手機有埋智能美顏模式，畀大家同女女自拍時呃下視覺效果。另外亦可以較埋手勢自拍，對住鏡頭張開手掌兩秒就可以倒數自拍。喺趣味變妝模式度仲有得加上兔仔耳呀貓鬚之類唔同嘅特效，氹女一流。值得一讚嘅係，前鏡仲配埋智能柔光燈，可以120度打燈，你知啦啲女仔影相好煩架嘛，打埋燈就唔怕佢哋臉黑！

前鏡頭一樣有得先影後對焦，景深效果非常自然，去旅行最啱。

「趣味變妝」 Filter可愛到令人忍唔住瘋狂自拍。

另外亦可以較埋手勢自拍，對住鏡頭張開手掌兩秒就可以倒數自拍，順勢畀女女扮下Kawaii。

後鏡頭方面為16MP+2MP雙鏡頭，可以營造虛化背景，不論影景物定人像可以玩到景深，而且可以做到先影後對焦，影嘅時候可以自己調較光圈，影完就算覺得唔滿意，都可以調整光圈同對焦。試相見到鏡頭相當銳利，貓毛根根分明，色調平衡而且對比度高，鏡頭景深效果亦相當出色，媲美旗艦級手機。另外有趣嘅係手機支援動態相片，可以好似另一個牌子Live Photo咁影2秒長嘅短片，玩法更多元化。

用主雙鏡頭開埋大光圈影貓方便，隨手就可以捕捉主子最美的角度。

一般風景相對比度高。

後置雙鏡頭可以做到先影後對焦，影完後可以點按圖片光圈icon編輯，再自行調整光圈同對焦，唔使驚唔啱心水。

規格方面都唔弱，HUAWEI nova 2i搭載Kirin 659處理器，配備4GB RAM、64GB ROM及3,340mAh電池，支援指紋感應器、雙卡雙待及最高128GB外置micro SD卡。此機備有流光金、曜石黑同極光藍，定價2,880港元。呢口價有得玩埋前後鏡景深，喂冇得輸啦，即刻要入返部同囡囡自拍幾張威威啦！首先......要有部機！