打手機Game唔覺唔覺都要洗好多錢，點數又係錢，數據又係錢。3香港宣布推出全新遊戲平台「3Gamer」，玩家可以一次過買晒MyCard、GASH、Razer zGOLD同Steam四大平台嘅點數，遲下仲有無限數據組合任打韓國手機遊戲《天堂Ｍ》，女朋友少個藉口詐型打機洗錢啦～掛。

3月費客戶用呢個「3Gamer」遊戲平台，上網站或用「3Care」App透過3帳戶畀錢，就可以購買MyCard、GASH同Razer zGOLD嘅手機或電腦點數；而遲吓亦可以透過平台買到Steam嘅點數，一站式集晒四個平台點數資訊，亦唔使再分開畀錢，打機課金（跌錢）又更方便。

3香港亦預告會推出「3Gamer」4.5G月費計畫，特點係指定遊戲有無限數據，亦包埋喺月費數據以外嘅P2P流動數據打機，換言之打機唔驚爆Data；指定遊戲包括矚目嘅人氣手機遊戲《天堂M》，收費詳情待定。《天堂M》中文版即將於年底喺香港推出，到時打機可以慳返啲數據錢。

同時3香港亦推出一款$138嘅「3Gamer」儲值卡，包2GB流動數據同$88儲值額，可以用嚟買點數或者數據。而每增值$100，會有100MB流動數據送；11月30日前買MyCard或GASH點數，亦有5%額外點數優惠。