買？唔買？　Samsung GALAXY Note 4

文：MenClub Patrick　　圖：MenClub
POSTED ON 25 Sep 2014

9月4日趕喺iPhone 6之前亮相嘅Samsung Note 4，避開咗iPhone 6開賣嘅瘋狂日子之後，啱啱終於喺香港正式發布......其實部機唔少人都已經知道係點，或者仲聽過講過好多評論，就連我再寫多次都覺得有啲悶，不如飛晒啲門面介紹，等我綜合吓各個forum啲人講嘅嘢，估吓可能係大家會買或唔買嘅各5個理由先。

5個買Note 4的理由 1. 聽講預購客戶可以抽奬去金秀賢見面會。（好肯定閣下俾身邊某女性要脅緊！） 2. 用八核U，有3GM RAM，又有32GB ROM，同韓版一樣，正呀！ 3. 今次支筆好似好用咗喎。 4. 我部Note 2夠期換，換乜好呀？唔知呀，買番Note 4囉。 5. 因為......唔想用S5同Note Edge囉...... 5個唔買Note 4的理由 1. 嘩！$6,298？ 2. 諗緊買LG G3同Sony Z3好呀！ 3. 唔支援大陸4G，我成日上去，點線？ 4. 用緊大芒iPhone 6 Plus啦！買乜春呀？！（警告你，唔L好話我係ifanboy呀！） 5. 咩話？乜冇得炒咩？唔買lu！

實機評測如果你仲係心大心細，未諗掂買唔買Note 4好，咁不如聽埋筆者喺發布會上接觸Note 4嘅真實感覺，然後再作決定。

1. 手感如何？ Note 4嘅造型大致跟番Note 3，亦繼續用番仿皮背蓋，質感同樣咁膠，不過佢加咗條金屬銀邊框，手感真係紮實咗，只係摸落角位有少少刮手。睇番面積數字，Note 4只比iPhone 6 Plus細少少，但實際拎上手嘅感覺好似細咗成截咁，雖然兩部機都冇可能單手篤得晒全個芒......

2. 2K芒有幾靚？ Note 4個S-AMOLED芒提升到2K級數，解像度去到2,560x1,440，官方指畫面線數超過500ppi，即係仲高過iPhone 6 Plus 100ppi有多。我喺現場睇Note 4個芒，確實可以用靚嚟形容，不過我對凡人嘅肉眼冇內置放大鏡，唔識放大個畫面去逐粒pixel數，所以自問唔會一眼就睇得出佢比上代個Full HD芒靚咗幾多，其實有時解像度同線數係數字遊戲嚟啫。至於同6 Plus比，問心，呢兩部機之中，有人會因為邊部個芒靚而決定買邊部咩？

3. 支筆真係好用咗？今次S Pen功能嘅壓力感應由1,024級增至2,048級，明顯睇得出畫畫嗰陣筆觸係比較粗幼分明，畫公係會畫咗。不過最好用其實係佢改良咗懸浮替令個圓形menu，只要烘埋支手寫筆去個芒度，再㩒筆身個掣，menu就會彈出嚟，上面有Action Memo、Smart Select、圖像剪貼同擷圖編寫4個功能。我覺得最好用係Smart Select，佢可以令S Pen變成mouse咁款，好輕易就可以揀到想要嘅文字，又可以同時highlight多張相，然後copy & paste或者經email、訊息等app send出去。

其他賣點最後略略都要提番Note 4嘅其他賣點，包括內置咗S5嘅指紋掃描器同心跳感應器，係爭在冇S5嘅防水功能。而Note 4嘅機背鏡頭像素就由上代1,300萬升到1,600萬，而且加入埋光學防震系統；前置鏡頭像素亦由200萬增至370萬，同時具備f1.9大光圈，兼且可選擇90或120度廣角模式，又可以將心跳感應器當快門掣使用，方便自拍。另外，Note 4仲新設快速充電功能，官方聲稱半個鐘就叉到50%電，係咪咁堅，就要留番畀用家買機後慢慢試真啲。

港版資料正如前面所講，港版Note 4係行Samsung Exynos八核心CPU（1.9 GHz四核心+1.3 GHz四核心），兼且配備3GB RAM同32GB ROM，同韓版機一樣達到現時Android機嘅最高規格。顏色方面，9月30日開賣日會先出黑同白色，比較深嘅金色版（唔係香檳金）就要再等公布幾時出；至於都有實機喺發布會出現嘅粉紅色版，Samsung就冇透露會唔會喺香港出行貨。另外，喺30日前去指定分銷商預購Note 4嘅話，就有機會獲得金秀賢見面會嘅入場證一張，名額100個。 Samsung GALAXY Note 4規格售價：$6,298 系統：Android 4.4 制式：FDD LTE、WCDMA、GSM 處理器：Samsung Exynos八核心（1.9 GHz四核心+1.3 GHz四核心）記憶體：3GB RAM 屏幕：5.7" Super AMOLED 2,560x1,440 鏡頭：1,600萬像素（後置）、370萬像素（前置）儲存空間：內置32GB、microSDXC（最高支援128GB）電池：可換式3,220mAh 體積：153.5x78.6x8.5mm 重量：176g 顏色：黑/白/金查詢：Samsung　www.samsung.com/hk 另外兩大新品
今次Samsung香港發布會都有展出埋上次全球首發嘅其他產品，當然包括埋最具話題嘅Note Edge同Samsung Gear VR。

曲得比想像低調　Samsung GALAXY Note Edge 睇見Note Edge嘅實物，覺得佢右邊個曲芒嘅弧度比想像中少，外形嘅突破性其實較為低調。拎上手，由於佢嘅機身都幾大，所以想用右手手指公㩒曲芒嘅掣都會有少少難度，初步睇嚟最得意都係透過小工具，將曲芒部分變成間尺。雖然港版Note Edge將會用番Snapdragon 805四核心2.7 GHz CPU，但反而會支援埋Note 4欠缺、能上大陸使用4G嘅TDD LTE制式，再加埋曲芒呢個大賣點，對照番Note 4嘅定價，佢有可能會賣接近$7,000，不過暫時未知推出日期。

得意睇全景　Samsung Gear VR 發布會嘅Gear VR demo係將Note 4裝上Gear VR播放一片劇院影片，透過特殊技術，成條片睇落有360度嘅全景效果，當我個頭轉嘅時候，睇到嘅畫面方向亦會跟住轉，幾得意！若然我本來係對住觀眾席嘅話，真係要轉成180度身先至會睇到劇院台上面嘅表演者，所以最好對啱方向先戴Gear VR上頭。當一段片播完後，只要拍吓眼罩側邊嘅地方，就可以操控replay或者播下一段片。成件事幾好玩，但當然有冇人買係另一回事。